نیویارک( پاکستان پوائنٹ نیوز28۔مئی2018ء ) امریکی ریاست الاسکا دی جیل وچ مسلمان قیدیاں نوں روزیاں وچ پورے دن دے روزے مگروں افطاری ویلے سور دا گوشت کھان لئی مجبور کیتا جا رہیا اے۔ قومی اخبار دی اک رپورٹ مطابق امریکی جیلر دا مسلماناں تے روزیاں نال تعصب کُھل کے ساہمنے آیا اے۔ روزیاں دے مقدس مہینے وچ الاسکا جیل اندر مسلمان قیدیاں نوں سحری تے افطاری ویلے سور دے گوشت نال بنے کباب تے ہور کھانے کھوائے جا رہے نیں۔
حالانکہ مسلمان قیدیاں نے جیل حکام نوں ایس توں پہلاں اک درخاست وچ یاد دہانی وی کروائی اے کہ اوہ مسلمان نیں تے اوہ روزیاں دے مہینے وچ پورے روزے رکھن گے۔ اوہناں نوں قیدیاں دے عام کمریاں دی بجائے اک سانجھا ہال دتا جائے،جتھے اوہ سکون کرسکن تے نماز پڑھ سکن۔ جدکہ اوہناں نوں روزیاں وچ سویر ویلے ناشتہ، دوپہر دا کھانا تے رات دا کھانا دین دی بجائے دو ویلے دا کھانا یعنی سحر و افطار دتا جائے۔
جوکہ بالکل حلال ہونا چاہیدا۔ پر امریکی جیلر نے تعصب دا وکھالا کردے ہوئے روزیاں دے شروع وچ تے سارے مسلماناں لئی سحر و افطار دا کھانا غائب کر دتا۔ جدوں مسلمان قیدیاں ولوں سحر و افطار نہ کرن اُتے احتجاج ریکارڈ کروایا گیا تے امریکی انتظامیہ نے مسلماناں نوں سور دے گوشت نال بنیاں شیواں حلال آکھ کے کھوا دتیاں تے ایہ عمل اک وار نہیں کئی وار کیتا گیا۔
پر جیل وچ قید اک غیر مسلم قیدی نے ساتھی مسلمان قیدیاں انس دیوال تے ارنٹ جیکپ سن اُتے انکشاف کیتا اے کہ جو کھانا مسلماناں نوں کھوایا جارہیا اے اوہ بیف یاں مٹن نہیں بلکہ سور دا گوشت اے۔ جیہدے مگروں جیل وچ قید مسلماناں پریشان نیں جدکہ امریکی نیوز چینل ’اے بی سی‘ نے الاسکا جیل وچ مسلماناں نوں سور دا گوشت کھوان دی تصدیق وی کیتی اے۔
