لندن(پاکستان پوائنٹ نیوز17۔ستمبر2016ء) عوامی تحریک دے سربراہ ڈاکٹر طاہر القادری نے آکھیا اے کہ ماڈل ٹاؤن دُکھانت خلاف اسیں قانونی جنگ لڑ رہے آں، ایس واقعے دے بعد پاکستان دے آئین تے قانون دی بدنامی ہوئی اے، اِنج دا واقعا دنیا دی تواریخ وچ نہیں ہویا۔تفصیل دے مطابق لندن وچ پریس کانفرنس دوران ڈاکٹر طاہر القادری نے آکھیا کہ اسیں ماڈل ٹاؤن دُکھانت خلاف قانونی جنگ لڑ رہے آں، جسٹس باقر دی رپورٹ وچ وزیر اعلا پنجاب نوں ماڈل ٹاؤن دُکھانت وچ نامزد کیتا گیا اے۔
رپورٹ وچ صرف انگلی نہیں بلکہ پورا ہتھ شہباز شریف اُتے رکھیا گیا اے۔ اوہناں نے آکھیا کہ تو قیر شاہ مسلسل قاتلاں نال رابطے وچ سی، پرنسپل سیکرٹری توقیر شاہ نوں جنیوا گھل دِتا گیا۔ اوہناں نے آکھیا کہ ایس ایس پی علی سلمان تے عبدالرحیم شیرازی نوں ٹریننگ دے ناں اُتے باہر گھل دِتا گیا اے ، انج دے ہور افسر جو وی ماڈل ٹاؤن دُکھانت وچ ملوث نیں اوہناں نوں باہرلکے ملک گھل دِتا گیا اے۔
طاہر القادری نے آکھیا کہ رانا ثناء اللہ نوں عارضی طور اُتے ہٹایا گیا تے اج فیر اوہی وزیر نیں،ڈی آئی جی عبدالجبار آپریشن دی نگرانی کر رہیا سی۔ اوہناں نے آکھیا کہ میڈیا دے کیمیریاں دے سامنے لوکاں نوں گولیاں دا نشانا بنانا گیا۔ اوہناں نے آکھیا کہ ساڈی ایف آئی آر احتجاج کرن دے بعد درج کیتی گئی تے سانوں ایف آئی آر درج کروان لئی لکھاں لوکاں دا سہار لینا پیا۔
