ریاض(پاکستان پوائنٹ نیوز27۔فروری2018ء) سعودی شاہ سلمان نے چیف آف سٹاف سنے اعلا فوجی کمانڈر برطرف کر دتے۔بی بی سی اُردو مطابق سعودی عرب نے رات گئے اک شاہی حکم نامے راہیں چیف آف سٹاف سنے وڈے کمانڈراں نوں برطرف کر دتا اے۔ سعودی شاہ سلمان نے زمینی تے فضائی فوج دے سربراہواں نوں وی بدل دتا اے۔ سعودی عرب دی سرکاری پریس ایجنسی مطابق ایہناں برطرفیاں دی کوئی وجہ نہیں بیان کیتی گئی۔
سعودی فوج پچھلے تن ورھیاں توں یمن وچ باغیاں نال لڑ رہی اے۔ آکھیا جا رہیا اے کہ ملک اندر ہون والیاں تبدیلیاں پچھے اصل وچ ولی عہد محمد بن سلمان دا ہتھ اے۔ پچھلے ورھے شہزادیاں تے ارب پتی تاجراں سنے درجناں سعودی شہریاں نوں گرفتار کر کے رٹز کار لٹن ہوٹل وچ قید کیتا گیا سی، جیہدی وجہ کرپشن دسی گئی سی۔ ایس پی اے مطابق چیف آف سٹاف جنرل عبدالرحمن بن صالح البنیان اوہناں بندیاں وچ شامل نیں جہناں نوں عہدے توں برطرف کیتا گیا اے۔
کئی فوجی افسراں نوں برطرف کیتے جان والے افسراں دے عہدیاں تے تعینات کر دتا گیا اے۔ ایس سلسلے وچ کئی سیاسی بھرتیاں دا اعلان وی کیتا گیا جہناں وچ اک سوانی نائب وزیر دی تعیناتی دا نواں فیصلا شامل اے۔ تمادار بنتِ یوسف الرمہ نوں مزدور تے سماجی بہبود دی وزارت وچ تعینات کیتا گیا۔
