ریاض(پاکستان پوائنٹ نیوز15۔فروری2018ء) سعودی عرب دے اک مشہور عالم دین احمد قاسم الغامدی نے آکھیا اے کہ ویلنٹائن ڈے اک مثبت سماجی تہوار اے ایہنوں منان وچ کوئی شرعی مناہی نہیں اے ،ایہنوں مذہب نال نہیں جوڑنا چاہیدا۔ سعودی سکالر احمد قاسم الغامدی نے ایہناں خیالاں دا اظہار اک انٹرویو دوران کیتا۔ اوہناں دا کہنا سی کہ بین الاقوامی پدھر اُتے ویلنٹائن ڈے سنے اسیں کئی سماجی تہوار مناندے آں جہناں وچ والدین دا عالمی دن وی شامل اے۔
ایہ سبھ تہوار تے سماجی نوعیت دے نیں جہناں دا براہ راست مذہب دے بنیادی عقائد نال کوئی تعلق نہیں اے۔ احمد قاسم الغامدی دا کہنا سی کہ ویلنٹائن ڈے دے عالمی دن نوں منان وچ وی کوئی شرعی پابندی نہیں اے تے نہ ای اسلام وچ ایس طرحاں دیاں سماجی سرگرمیاں دی کوئی مناہی اے۔ اوہناں دا کہنا سی کہ اسلام تے لوکاں وچکار چنگی گل نوں عام کرن دی تلقین کردا اے۔ تُسیں کسے نوں مبارک دیندے او تے ایہدے وچ کوئی حرج نہیں ۔ خیر تے بھلائی دی گل صرف مسلماناں نال نہیں بلکہ یہودی و نصاری نال وی کیتی جا سکدی اے۔ اوہناں دا کہنا سی کہ ویلنٹائن ڈے مخالفین ایہنوں اسلام نال جوڑدے نیں۔ اوہناں دا دعوا اے کہ ایہ جاہلیت دے تہواراں وچوں اک اے پر ایہ صرف اک سماجی تہوار اے۔
