امریکا(پاکستان پوائنٹ نیوز09۔جنوری2018ء) فرقہ واریت نوں رد کرن والے نوجواناں دے ویاہ کرن دے قصے تے سُنے ہون گے پر مسلمان تے یہودی دے ویاہ بارے گھٹ ای پہلاں کدی سُنیا ہوئے گا۔ دنیا بھر وچ اپنے مذہب توں باہر ویاہواں دا رواج عام ہوندا جا رہیا اے۔ مُنڈا کُڑی اک دوجے دے مذہب دی پرواہ کیتے بغیر ای ویاہ کر لیندے نیں جہدے اُتے اوہناں نوں تنقید دا نشانہ وی بنایا جاندا اے۔
امریکا وچ اک پاکستانی نژاد مسلمان کُڑی نے یہودی مُنڈے نال پسند دا ویاہ کر لیا اے۔ ملیحہ خان نے ایلان کروڈووا نال امریکا وچ ویاہ کیتا۔ دوواں دی ملاقات اک ڈیٹنگ ایپ اُتے مئی 2016وچ ہوئی ،کُجھ ملاقاں مگروں دوواں نے ویاہ کرن دا فیصلا کیتا۔ 33ورھیاں دی ملیحہ خان پاکستان دے شہر کراچی دی رہن والی اے۔ امریکا وچ سمتھ کالج توں تعلیم حاصل کرن مگروں ملیحہ نے ایم بی اے دی ڈگری ہارورڈ یونیورسٹی وچ لئی۔
دوجے پاسے 34ورھیاں دے ایلان دی پرورش سیٹل وچ ہوئی۔ ایلان نے کولمبیا یونیورسٹی توں ایم بی اے کیتا اے۔ دوویں اک ٹرپ اُتے گئے جہدے بارے ایلان دا کہنا سی کہ مینوں ملیحہ دا آپ وساہ (خود اعتمادی) پسند آیا۔ ایس ٹرپ اُتے سانوں دوواں نوں احساس ہویا کہ اسیں اک دوجے نال رہ سکدے آں۔ ملیحہ نے آکھیا کہ میں لمے چِر توں اپنے گھر والیاں توں دور سی۔ ایس ایڈونچر ٹرپ اُتے مینوں لگا کہ میں ایلان اُتے بھروسہ کر سکنی آں۔
