جدہ(پاکستان پوائنٹ نیوز06۔جنوری2018ء) انٹرنیٹ سماں دیاں قیمتاں وچ وادھا کرن والیاں کمپنیاں دی شامت آ گئی اے۔ عرب نیوز دے مقامی وسیلیاں مطابق سعودی عرب وچ مشہور مواصلاتی کمپنیاں نے پہلی جنوری 2018ویلیو ایڈڈ ٹیکس لاگو ہون مگروں اچن چیت سماں دیاں قیمتاں وچ 50فیصد تیکر وادھا کرکے ورتیندڑاں نوں پریشان کر دتا اے، جہدے مگروں سعودی عرب دی مواصلاتی وزارت نے اوہناں خلاف تحقیقات دا حکم دے دتا اے۔
مواصلاتی بورڈ دے ترجمان عادل ابو حمید نے واضح کیتا اے کہ انٹرنیٹ پیکج تے سم مہنگی کرن والیاں کمپنیاں اُتے جرمانے ہون گے۔ مواصلاتی بورڈ نے انٹرنیٹ سم دے ریٹ 50فیصد تیکر ودھان والیاں کمپنیاں خلاف تحقیقات شروع کر دتیاں۔ بورڈ دے لائحہ عمل مطابق قاعدے ضابطے دی خلاف ورزی اُتے جرمانے متھے نیں۔ ورتیندڑاں نے کمپنیاں خلاف شکایتاں درج کروائیاں نیں۔
ابو حمید نے الوطن اخبار نال گل بات کردے ہوئے آکھیا کہ کئی ورتیندڑاں دا کہنا اے کہ اِنج لگدا اے کہ انٹرنیٹ سروس دین والیاں کمپنیاں نے آپسی وچ گٹھ جوڑ کر لیا اے تے ایس ویلے جوپیکج دتے جا رہے نیں اوہ آپسی گٹھ جوڑ دا حصہ لگدے نیں۔ ابو حمید نے وعدہ کیتا کہ تحقیقات ہون اُتے تفصیلاں تے قرارداداں اُتے مشتمل وضاحتی بیان جاری کیتا جائے گا۔
