بیجنگ(پاکستان پوائنٹ نیوز03۔جنوری2018ء) چینی ماہرین نے آکھیا اے کہ دہشت گردی بارے ڈونلڈ ٹرمپ دی پاکستان اُتے تنقید ایس گل دا اشارہ اے کہ امریکا ہند بحر الکاہل حکمت عملی لئی اتحاد بنان وچ بھارت نال تعلقات دا خاہشمند اے۔ شنگھائی انسٹی ٹیوٹ فارانٹرنیشنل سٹڈیز دے ایشیا بحرالکاہل مطالعاتی مرکز دے ڈائریکٹر ذہاؤ گنچنگ نے گوبل ٹائمز نوں دسیا کہ نائین الیون دے واقعے مگروں افغانستان وچ دہشت گرداں خلاف کارروائی لئی پاکستان دا تعاون امریکا دا پہلا تقاضا تے بنیادی شرط سی۔
پاکستان نے ایس سلسلے وچ 15سال تیکر اوہدے نال تعاون کیتا جہدے نال دوویں ملکاں (امریکا تے پاکستان) نوں فائدہ پہنچیا ایتھوں تیکر کہ ایس ویلے وی پاکستان، افغانستان وچ تعینات 15000امریکی فوجیاں دی سپلائی لائین اے۔ اوہناں نے آکھیا کہ امریکی صدر دا پاکستان بارے بیان ایس گل دا اشارہ اے کہ امریکا بھارت نوں اپنا اتحادی بنان دا خاہشمند اے۔ ذہاؤ نے آکھیا کہ وزارتی سطح دے اجلاس مگروں ہن پاکستان تے چین دے تعلقات ہور پکے ہو گئے نیں۔ ایہو وجہ اے کہ امریکا دا بھارت ول جھکاؤ اے۔
