لندن(پاکستان پوائنٹ نیوز19۔اکتوبر2017ء) مسلم لیگ (ن) دے صدر و سابق وزیر اعظم میاں محمد نواز شریف نے آکھیا اے کہ غیر موجودگی وچ فرد جرم لان دی کوئی مثال نہیں ملدی‘ امید اے کہ میرے نال انصاف کیتا جائے گا‘ پاکستان وچ انصاف دا خون ہو رہیا اے‘ 26اکتوبر توں پہلے ملک واپس جا کے مقدمیاں دا ساہمنا کراں گا‘ پاناما وچ کُجھ نہ ملیا تے اقامہ وچ ای فیصلا دے دتا گیا۔
اوہناں نے اج لندن وچ میڈیا نال گل بات کردے ہوئے آکھیا کہ من پسند لوکاں نوں جے آئی ٹی دا ممبر بنایا گیا۔ جہدے وچ ساڈے مخالف وی شامل سن۔ من پسند لوک جے آئی ٹی ممبراں بنا کے مرضی دے فیصلے لِتے گئے۔ اوہناں نے فیر ایسے طرحاں دی رپورٹ ای دینی سی‘ جو قوم ساہمنے اے۔ نواز شریف دا کہنا سی کہ امید اے میرے نال انصاف کیتا جائے گا۔ پاکستان وچ انصاف دا خون ہو رہیا اے۔
اوہناں دا کہنا سی کہ غیر موجودگی وچ فرد جرم لان دی کوئی مثال نہیں ملدی۔ کیہ احتساب ایس طرحاں دا ہوندا اے؟ اوہناں نے آکھیا کہ اقامے اُتے فیصلا کرن دی کیہ ضرورت سی؟ کئی پاکستانیاں کول اقامے نیں۔ بلکہ ہر تیجے پاکستانی کول اقامہ اے۔ نواز شریف نے آکھیاکہ پاناما وچ کُجھ نہ لبھیا تے اقامے وچ فیصلا دے کے نااہل کر دتا گیا۔
