لندن(پاکستان پوائنٹ نیوز03۔اکتوبر2017ء) برطانوی فضائیہ دی اُچیچی فورس دے 40کمانڈوز کُجھ چِر پہلاں شام وچ کارروائی کردے ہوئے اک اہم شدت پسند شخصیت نوں زندہ یاں مردہ حالت وچ گرفتار کرن لئی اوتھے پہنچے۔ میڈیا رپورٹس مطابق ایہ مطلوب شخصیت حمزہ بن لادن اے جہنے کئی ورھے نظروں اوہلے رہ کے پہلے پاکستان تے فیر ایران وچ لنگھایا۔ امریکیاں نے 2011وچ ایب آباد آپریشن کر کے حمزہ دے والد و القاعد دے بانی اسامہ بن لادن دی زندگی دا خاتمہ کر دتا سی۔
ایہدے مگروں حمزہ نے تنظیم دیاں ذمے واریاں سنبھالیاں۔ پر مغربی طاقتاں ایہ نہیں چاہندیاں کہ حمزہ اپنے والد وانگ شدت پسندی نوں کھلارن وچ کامیاب ہو سکے۔ ایسے واسطے مشہور برطانوی فورس دے 40کمانڈراں نوں اوہدی بھال لئی گھلیا گیا۔ کمانڈراں نوں حکم دتا گیا کہ حمزہ نوں زندہ یاں مردہ حالت وچ قابو کیتا جائے۔ اسامہ دا 27ورھیاں دا پُتر حمزہ بن لادن القاعدہ دے موجودہ سربراہ ایمن الظواہری دا جوائی اے۔ اوہدی اک دھی تے اک پُتر اے۔ پُتر دا ناں سعد جدکہ دھی دا ناں خیریہ اے۔
