کابل(پاکستان پوائنٹ نیوز30۔ستمبر2017ء) کابل وچ امام بارگاہ دے باہر آپ مارو حملے دے نتیجے وچ 10بندے ہلاک تے 27زخمی ہوگئے‘ بعدوں افغان سکیورٹی فورسز نے دھماکے والی تھاں نیڑیوں دوجے آپ مارو حملا آور نوں گرفتار کر لیا۔میڈیا رپورٹس مطابق حکام نے دسیا کہ بم حملا آور بکریاں دا آجڑی بن کے راجدھانی دے قلعہ فتح اللہ دے علاقے وچ لوکاں دی بھیڑ وچ وڑ گیا۔
جدوں پولیس دے اک محافظ نے اوہنوں روکن دی کوشش کیتی تے اوہنے اپنے آپ نوں اُڈا لیا۔حکام مطابق آپ مارو حملے دے نتیجے وچ 10بندے ہلاک تے 27زخمی ہوگئے۔ بعدوں افغان سکیورٹی فورسز نے دھماکے والی تھاں نیڑیوں دوجے آپ مارو حملا آور نوں گرفتار کر لیا۔افغان حکام مطابق جدوں حملا آور نے اپنے آپ نوں دھماکے نال اُڈایا، اوس ویلے لوک نماز پڑھ کے باہر نکل رہے سن۔ اودھر افغان صدر اشرف غنی نے بم حملے دی نندیا کیتی اے۔ طالبان دے اک ترجمان نے باغی گروپ ولوں ایس دہشت گرد حملے وچ ملوث ہون دی گل نوں رد کردے ہوئے آکھیا کہ اوہناں دا ایہدے نال کوئی تعلق نہیں۔
