واشنگٹن‘ لندن(پاکستان پوائنٹ نیوز16۔ستمبر2017ء) برطانوی اخبار نے دعوا کیتا اے کہ امریکا نے پاکستان نوں اپنے اتحاد توں کڈھن بارے غور شروع کر دتا اے۔ برطانوی اخبار فنانشل ٹائمز نے وسیلیاں دے حوالے نال دعوا کیتا کہ واشنگٹن پاکستان اُتے دہشت گرداں دیاں پناہ گاہواں دے خاتمے لئی دباء ودھان لئی اوہنوں اپنے اتحاد توں کڈھن بارے غور کر رہیا اے۔
اخبار مطابق واشنگٹن پاکستانی بھوئیں ورتن والے 20دہشت گرد گروپاں خلاف کارروائی لئی سخت اقدامات بارے غور کر رہیا اے۔ امریکا وچ سابق پاکستانی سفیر حسین حقانی دا کہنا اے کہ ایس توں پہلاں کدی وی امریکی صدر نے قومی ٹیلی ویژن اُتے آ کے پاکستان بارے اجیہیاں گلاں نہیں کیتیاں۔ سابق سی آئی اے دی تجزیا کار و موجودہ نیشنل سکیورٹی کونسل وچ جنوبی ایشیا پالیسی دی سربراہی کرن والی لیزاکرٹس نے پچھلے ورھے حسین حقانی نال اک سانجھی رپورٹ وچ لکھیا سی کہ اک اتحادی دے طور اُتے تصور کرنا اگلی انتظامیہ لئی مسئلے پیدا کر دا رہوے گا۔
