واشنگٹن(پاکستان پوائنٹ نیوز10۔اگست2017ء) پاکستان و بھارت وچکار امریکی دارالحکومت واشنگٹن وچ پانی دے جھیڑے اُتے ہون والے مثبت مذاکرات مگروں دوویں ملکاں وچکار ایس مسئلے دا دوستانہ حل ساہمنے آن دی امید پیدا ہو گئی۔ میڈیا رپورٹس مطابق چالو مہینے اگست نوں عالمی بنک نے خیر سگالی تے سانجھے تعاون دے جذبے نال سیکرٹری سطح دے مذاکرات وچ مثبت تبدیلی ول اشارا کیتا سی۔
مذاکرات دوران پاکستان و بھارت دے وفد 330میگا واٹ دے کشن گنگا تے 850میگا واٹ دے ہائیڈرو الیکٹرک پاور پلانٹ دے منصوبیاں تے راضی نہیں ہوئے تے نہ ای ورلڈ بنک ایہناں منصوبیاں تے سرمایہ کاری لئی راضی اے۔ پاکستان دا موقف اے کہ دوویں منصوبے سندھ طاس دی خلاف ورزی اے۔ پاک بھارت پانی دے جھیڑے تے ڈونگھی اکھ رکھن والے اک بین الاقوامی ماہر نے دسیا کہ انج پچھلے کئی ورھیاں مگروں پہلی وار ہویا کہ دوویں پاسیوں اپنی روایتی پوزیشن تے گل کرن دی بجائے تعمیری گل بات ہوئی جدکہ پچھلیاں ملاقاتاں دوران کئی وار دوویں ملکاں ولوں رسمی سلام دعا تیکر نہیں ہوئی۔
