زیورح (پاکستان پوائنٹ نیوز18۔اگست 2016ء) ایمنسٹی انٹرنیشنل دی اک رپورٹ وچ آکھیا گیا اے کہ شام وچ زیر حراست بندیاں اُتے مبینا طور اُتے جیلاں وچ تشدد تے ریپ پاروں تقریبا 18 ہزار بندے ہلاک ہو گئے نیں۔ انسانی حقاں دی تنظیم دی رپورٹ دے مطابق سرکاری جیلاں وچ ہون والیاں ایہ موتاں 2011 توں 2015 دے درمیان ہوئیاں نیں۔ ایمنسٹی دا کہنا اے کہ ایس رپورٹ وچ 65 دے نیڑے بندیاں دے انٹرویو شامل نیں جہناں نوں آپ تشدد دا سامنا کرنا پیا سی تے اوہناں نے حراستی مرکزاں تے جیلاں وچ ہون والے خوفناک پرتشدد واقعیاں بارے دسیا اے۔
تنظیم نے عالمی براداری توں درخاست کیتی اے کہ اوہ شام وچ ہون والے تشدد نوں ختم کرن لئی اپنا رول ادا کرے۔ جدکہ دوجے پاسے شامی حکومت اِنج دے الزاماں نوں رد کر رہی اے۔ ایمنسٹی انٹرنیشنل ولوں ایہ رپورٹ جمعرات دے دیہاڑے چھپی جہدا ناں ’اٹ بریکس دا ہیومن‘ اے۔ ادارے دا کہنا اے کہ اندازے دے مطابق مارچ 2011 توں 2015 دے درمیان شامی صدر بشارالاسد خلاف بغاوت دے شروع ہون دے بعد توں 17723 توں ودھ قیدی ہلاک ہو گئے نیں۔
رپورٹ وچ ہور آکھیا گیا اے کہ ایس تناسب وچ ہر روز دس تے ہر مہینے تِن سو دے نیڑے لوک مر رہے نیں۔ جدکہ کئی قیدیاں نوں جیلاں وچ آن دے بعد اہلکاراں ولوں ڈاڈھے تشدد دا سامنا کرنا پیندا اے جہنوں استقبالیا آکھیا جاندا اے۔ ادارے دے مطابق اوہدے بعد اکثرتلاشی دا عمل، شروع ہو ندا اے تے ایس دوران خاص طور اُتے سوانیاں نوں مرد اہلکاراں ولوں ریپ تے جنسی تشدد دا نشانا بنایا جاندا اے۔
اک قیدی ثمر نے ایمنسٹی نوں دسیا کہ اہلکارساڈے نال جنوراں ورگا سلوک کردے سن، محافظ جتھوں تیکر ہو سکے لوکاں نال غیر انسانی سلوک کردے نیں۔ ثمر نے ہور دسیا کہ میں خون نوں انج وگدے ویکھیا جویں کوئی دریا ہووے، اک قیدی نے دسیا کہ کویں خفیا ایجنسی دے حراستی مرکزاں وچ ہوا بند ہون نال اک ای دن وچ 7 بندے ہلاک ہو ئے۔جدکہ ایمنسٹی انٹرنیشنل مشرق وسطی تے شمالی افریقا دے ڈائریکٹر فلپ لوتھر دا کہنا اے کہ کئی دہاکیاں تیکر شام دی حکومتی فورس اپنے مخالفاں نوں ختم کرن لئی تشدد دی ورتوں کر رہی اے۔
اوہناں نے آکھیا کہ اج کل جہڑے بندے اُتے حکومت مخالفت دا شبا ہووے اوہنوں جیل گھل دِتا جاندا اے۔۔ ایس حوالے نال ایمنسٹی تے ہور انسانی حقاں دے اداریاں دا کہنا اے کہ ایہناں الزاماں اُتے عالمی برادری ولوں گل بات کیتی جانی چاہیدی ۔
