مکہ(پاکستان پوائنٹ نیوز22۔جون2017ئ) مکہ مکرمہ وچ اللہ دے پروہنیاں دی حفاظت لئی رپیڈ ایکشن فورس تعینات اے۔ریپڈ ایکشن فورس دے کمانڈر میجر محمد سعد القرنی صورت حال اُتے نظر رکھدے ہوئے اپنی ٹیم دے ارکان نوں ہدایتاں دین وچ رُجھے ہوندے نیں۔ عرب نشریاتی ادارے نال گل بات کردے ہوئے میجر القرنی نے دسیا کہ اسیں بیت اللہ دی زیارت کرن والیاں لئی انسانی خدمت پیش کردے آں۔
ایس دوران لوڑ مطابق ہدایت ملن اُتے فوری مداخلت دی کارروائی وی انجام دینے آں۔ الشمیسی چیک پوائنٹ اُتے تعینات سارجنٹ صالح الربیعان دیاں عقابی اکھاں ہر آن والی سواری اُتے نظر رکھی ہوندیاں نیں۔ امن و سلامتی نوں یقین بنان لئی اوہ ہر ویلے تیار رہندے نیں۔ ریپڈ ایکشن دے اہلکار صالح الربیعان نے دسیا کہ ایہ میرے لئی فخر دی گل اے کہ میں اللہ دے پروہنیاں دی خدمت کرن والے یونٹ وچ رلتی آں۔ میں تے میرے ساتھی ایہدے اُتے فخر کردے نیں تے ایہ ساریاں لئی سعادت دی گل اے۔ سعودی عرب ولوں مکہ مکرمہ دے باہرلے رستیاں اُتے دن رات مستقبل طور اُتے رپیڈ ایکشن یونٹاں نوں تعینات کر کے ملک دی سکیورٹی نوں مضبوط بنایا جا رہیا اے۔
