مکہ(پاکستان پوائنٹ نیوز21۔جون2017ئ) حرمین شریفین دے امور دی جنرل پریذیڈنسی ولوں خانہ کعبہ دے غلاف دی مسلسل ویکھ بھال دا سلسلا جاری رہندا اے جہد امقصد غلاف دی نفاست تے پائیداری نوں برقرار رکھنا اے۔ مقامی حکام مطابق مسجد الحرام وچ غلاف کعبہ دی صفائی دے اُچیچے یونٹ دے ارکان جدید ترین مشیناں راہیں گھٹو گھٹ ویلے وچ خانہ کعبہ دی کندھ توں دھوڑ صاف کردے نیں۔
غلاف کعبہ اُتے موجود مٹی دے ذرے نوں کاٹن دے کپڑیاں تے اُچیچیاں میشناں نال صاف کیتا جاندا اے۔ طواف دوران کئی لوکاں دے لٹک جان کارن غلاف کعبہ کئی تھاواں توں پھٹ جاندا اے۔ ایس لئی اوہدی چھیتی سلائی تے مرمت دا سلسلا وی سال بھر جاری رہندا اے۔ ایس مقصد لئی غلاف دی ویکھ بھال کرن والے یونٹاں نے شفٹاں طے کیتیاں ہوئیاں نیں۔ ہر شفٹ وچ دو اہلکار ہوندے نیں جہناں دی بنیادی ذمے واری غلاف کعبہ دی صفائی کرنا اے۔ ایس یونٹ دیاں ذمے واریاں وچ حجر اسود تے رکن یمانی دی نگرانی کرنا وی شامل اے۔ غلاف کعبہ دی مرمت تے صفائی دی جامع کارروائی نوں یقینی بنان توں وکھ ہفتے وچ اک وار اوہنوں خشبو نال معطر وی کیتا جاندااے۔
