دبئی(پاکستان پوائنٹ نیوز15۔جون2017ء) ترکی دے وزیر خارجا مولود چاوش اوگلو نے آکھیا اے کہ سعودی فرمانروا شاہ سلمان بن عبدالعزیز قطر نال پیدا ہون والے بحران دے حل دی صلاحیت رکھدے نیں جدکہ خلیجی ریاستاں وچکار پیدا ہون والے سفارتی جھیڑے دے حل لئی ترکی مفاہمتی کوششاں جاری رکھے گا۔ ترک وزیر خارجا نے ایہناں خیالاں دا اظہار ’العربیہ‘ نال ٹیلی فون اُتے گل بات کردے ہوئے کیتا۔
اوہناں نے آکھیاکہ خادم الحرمین الشریفین شاہ سلمان بن عبدالعزیز واحد شخصیت اے جو قطر نال بحران نوں حل کر سکدی اے۔ اوہناں دا کہنا سی کہ صدر طیب اردوان دے بیان وچ سعودی عرب نوں تنقید دا نشانا نہیں بنایا گیا۔ اسیں سارے فریقاں وچکار باہمی احترام دے اصول تحت مفاہمت دے حامی آں۔ ترکی قطری قیادت سنے دوجے خلیجی ملکاں دی قیادت نال وی رابطے وچ اے۔ اوہناں امید دا وکھالا کردے ہوئے آکھیا کہ روزے ختم ہون توں پہلاں بحران دا کوئی حل نکل آئے گا۔ اک سوال دے جواب وچ مولود چاوش اوگلو نے آکھیا کہ خطے دے سارے ملک ترکی لئی احترام جوگ تے بھرا نیں۔ اسیں ساریاں نوں اکو جہی اہمیت دینے آں۔
