آستانہ(پاکستان پوائنٹ نیوز09۔جون2017ء) وزیر اعظم میاں نواز شریف تے روسی صدر ولادی میر پیوٹن وچکار ملاقات ہوئی اے، ملاقات دوران معاشی و سکیورٹی تعاون دے حوالے نال وچار وٹاندرا کیتا گیا۔ میڈیا رپورٹس مطابق آستانہ وچ وزیر اعظم میاں محمد نواز شریف تے روسی صدر وچکار ملاقات ایس سی او سربراہ کانفرنس دے موقعے تے ہوئی۔ روسی صدر نے وزیر اعظم نواز شریف دا چاہواں نال استقبال کیتا۔
روسی صدر نے وزیر اعظم نواز شریف نوں ہر قسم دے تعاون دی یقین دہانی کروائی۔ ملاقات وچ روسی صدر نے پاکستان نوں شنگھائی تنظیم دا مستقل رکن بنن اُتے مبارکباد وی دتی۔ ملاقات وچ دوویں ملکاں وچکار معاشی و سکیورٹی تعاون ودھان سنے خطے دی چالو صورتحال دے حوالے نال وچار وٹاندرا کیتا گیا۔ روسی صدر نے دہشت گردی دے خاتمے لئی پاکستان دیاں قربانیاں تے کوششاں نوں سلاہیا۔ روسی صدر نے آکھیا کہ خطے وچ دہشت گردی خلاف پاکستان دا کردار اہم اے۔
