تہران(پاکستان پوائنٹ نیوز07۔جون2017ء) ایرانی پارلیمنٹ وچ فائرنگ تے خمینی دے مزار اُتے آپ مارو حملا کرن دی ذمے واری داعش نے قبول کر لئی اے۔ ایران دی نیم سرکاری نیوز ایجنسی ’تسنیم‘ مطابق پارلیمان دی بلڈنگ وچ ہون والے حملے وچ موتاں دی گنتی ودھ کے ست ہو گئی اے جدکہ حملے آوراں نے بلڈنگ دی اُتلی منزل اُتے چار بندیاں نوں یرغمال وی بنالیا اے پر اجے تیک سکیورٹی وسیلےاں ولوں ایس خبر دی تصدیق نہیں کیتی گئی۔
نیوز ایجنسی مطابق یرغمالیاں نوں رہا کران دی کوشش کرن والی ٹیم نے تن وچوں اک حملا آور نوں ہلاک کر دتا اے۔ حملا آواراں دی فائرنگ نال اک سکیورٹی اہلکار ہلاک تے کُجھ زخمی ہوئے نیں۔ حملا آور دی اجے شناخت نہیں ہو سکی۔ مقامی میڈیا دے وسیلیاں دسیا کہ آپ مارو حملا پارلیمنٹ دی بلڈنگ توں 20کلو میٹر دور واقع مزار وچ اُتے ہویا۔ دھماکے وچ سوانی حملا آور دے ملوث ہون دا آکھیا جا رہیا اے۔ دوجے پاسے شدت پسند تنظیم ’داعش‘ نے حملے دی ذمے واری قبول کر لئی اے۔ داعش نے نیوز ایجنسی ’عماق‘ راہیں حملے دی ذمے واری قبول کیتی۔
