نیویارک(پاکستان پوائنٹ نیوز17۔مئی2017ء) پاکستان وچ غداری دے مقدمے وچ قید ڈاکٹر شکیل آفریدی دی رہائی لئی امریکا نے پاکستان اُتے دباءودھانا شروع کر دتا اے۔ تفصیل دے مطابق امریکا نے پاکستان وچ گرفتار پاکستانی ڈاکٹر تے پولیو مہم دے انچارج شکیل آفریدی دی رہائی لئی دباءودھانا شروع کر دتا اے ۔ایس حوالے نال امریکی حکام نے پاکستان نال رابطا کیتا اے۔
امریکی رسالے ’وال سٹریٹ جرنل‘ نے دعوا کیتا اے کہ ٹرمپ انتظامیا اسامہ بن لادن دی بھال وچ مدد کرن والے ڈاکٹر شکیل آفریدی دی رہائی لئی متحرک ہو گئی اے تے ایس حوالے نال امریکی حکام نے پاکستان نال رابطا وی کیتا اے۔ رسالے دے مطابق شکیل آفریدی دے وکیلاں نال رابطا کیتا گیا، ایس دوران اوہناں ولوں انکشاف کیتا گیا کہ شکیل آفریدی دی صحت نوں خطرا ہو سکدا اے ایس لئی اوہناں دے علاج لئی اوہناں نوں باہرلے ملک گھلیا جائے۔
امریکی رسالے مطابق ڈاکٹر شکیل آفریدی دے کیس دی اگلی سنوائی 24مئی نوں ہووے گی، جہدے توں پہلے ای امریکی حکومت متحرک ہو گئی اے تے ایس حوالے نال دوویں ملکارں مڈھلی گل بات شروع ہو گئی اے۔وسیلیاں دا کہنا اے کہ وزیر اعظم پاکستان تے امریکی صدر دی سعودی شہر ریاض وچ ملاقات دی امید اے، ملاقات وچ ٹرمپ شکیل آفریدی دی رہائی لئی اک وار فیر وزیر اعظم نال گل بات کرن گے۔
