نویں دِلی(پاکستان پوائنٹ نیوز06۔مئی2017ء) بھارت نے اپنی سپیس ڈپلومیسی دے تحت سار ک ملکاں نوں تحفہ دیندے ہوئے ساﺅتھ ایشیا سیٹلائٹ لانچ کر دتا۔ پاکستان دا انحصار ایس حوالے نال چین اُتے اے پر پاکستان نے پہلے ای تحفہ قبول کرن توں انکار کر دتا سی۔ بھارتی ٹی وی دے مطابق ساﺅتھ ایشیا سیٹلائٹ نوں جنوبی بھارت دے صوبے آندھرا پردیش وچ سری ہری کوٹہ وچ موجود ستیش دھون خلائی مرکز نال خلاءوچ گھلیا۔
وزیر اعظم نریندر مودی نے ایس کامیابی اُتے بھارتی سائنس داناں نوں مبارک دیند ے ہوئے اپنے ٹویٹ وچ آکھیا کہ ایس کم نال جنوبی ایشیا تے ساڈے خطے نوں ڈاڈھا فائدا ہووے گا۔ ایہ اک تواریخی ویلا اے تے ایہنے دوجے ملکاں نال رابطے دے نویں راہ کھول دتے نیں۔ 50 میٹر اُچے تے 22سو تیہ کلو بھاری ایس سیٹلائٹ دی تیاری اُتے 235کروڑ رُپئے خرچا آیا۔ پر لانچ سنے ایس پورے پروجیکٹ اُتے تقریبن 450کروڑ رُپئے خرچ ہون گے۔
ایس مشن دی مدت بارھاں سال ہووے گی۔ چیتے رہوے کہ بھارتی وزیر اعظم نریندر مودی نے اقتدار وچ آن مگروں جون 2014وچ جنوبی ایشیائی ملکاں لئی ’سارک سیٹلائٹ‘ دا تحفہ دین دی گل آکھی سی۔ نومبر 2014وچ گھٹمنڈو وچ 18ویں سارک کانفرنس وچ اوہناں نے ایہدا آئیڈیا پیش کیتا۔ ہن پچھلی 30اپریل نوں اوہناں نے اپنی مہینہ وار ریڈیو تقریر اُتے وی ایس منصوبے دا ذکر کردے ہوئے آکھیا کہ ایہنوں ”سب کا ساتھ‘ سب کاوکاس‘ (ترقی)اصول اُتے تیار کیتا گیا اے۔
