دبئی، نویں دِلی(پاکستان پوائنٹ نیوز05۔مئی2017ء) دنیا دی سبھ توںموٹی مصری سوانی بھارتی ہسپتال چھڈکے متحدہ عرب امارات منتقل ہوگئی، ایمان احمد دا بھارتی ہسپتال چھڈن ویلے بھار 500کلو سی جدکہ بھارتی ڈاکٹراں نے دعوا کیتا سی کہ ایمان دا 250کلو تک بھار گھٹ ہو گیا اے۔ میڈیا رپورٹس دے مطابق دنیا دی سبھ توں موٹی سوانی ہور علاج لئی متحدہ عرب امارات دے ہسپتال وچ منتقل ہو گئی اے۔
ایمان نامی سوا نی دا بھار بھارتی ہسپتال چھڈن ویلے 500کلو سی جدکہ بھارتی ڈاکٹراں دا کہنا سی کہ ایمان دا 250کلو بھار گھٹ ہویا اے۔ مصری سوانی ایمریٹس ائر لائن راہیں متحدہ عرب امارات پہنچی جتھے اک سال تک اوہدا علاج کیتا جائے گا۔ پچھلے کُجھ ہفتیاں توں ایمان دے خاندان تے بھارتی ڈاکٹراں وچکار اختلافات ویکھن وچ آ رہے سن۔ دوجے پاسے ایمان دی بھین نے سوشل میڈیا اُتے اک فلم جاری کیتی سی کہ ایمان اجے تک بول تے حرکت نہیں کر سکدی ۔
ایمان دی بھین دا کہنا سی کہ بھارتی ڈاکٹراں دا ایہ دعوا وی غلط اے کہ اوہناں نے ایمان دا بھار 250گھٹا دتا اے۔ بھارتی ڈاکٹراں نے ایمان دی بھین دے دعوے نوں بے بنیاد قرار دتا اے، بھارتی ہسپتال دے سرجن مطابق ایمان دی بھین اوہنوں اوس ویلے تک ہسپتال رکھنا چاہند سی جدوں تک اوہ اک وار فیر ٹرن پھرن جوگی ہو جاندی پر ہڈیاں دے ڈاکٹراں مطابق ہن ایمان مُڑ ٹرن پھرن دے قابل نہیں ہو سکدی۔
