بیجنگ(پاکستان پوائنٹ نیوز04۔مئی2017ء) چین پاکستان اقتصادی راہداری منصوبا پاکستان وچ نہ صرف اقتصادی ترقی دی وجہ بنے گا بلکہ ملک نوں ترقی ول لےجائے گا۔ چین دے مشہور اخبار ’گلوبل ٹائمز‘ نے یونیورسٹی آف چائنا دے پروفیسر وانگ ہائی وائی دے حوالے نال اپنی اُچیچی رپورٹ وچ آکھیا اے کہ چین دے نویں ایس منصوبے دا فائدا ایہ اے کہ ایہ چین نوں خطے نال جوڑے گا تے سارے ملکاں وچ عمومی ترقی تے خشحالی لیائے گا۔
اوہناں نے آکھیا کہ اقتصادی راہداری منصوبے راہیں سارے ملکاں لئی چنگی مثال قائم ہووے گی تے سبھ توں اچھا اثر ایہ ہوئے گا کہ ایس منصوبے نال جنوبی ایشیا وچ ترقی ہووے گی۔ چین تے پاکستان وچکار تعاون نال پاکستان نوں غربت دے لَمے چکر، تشدد تے دہشت گردی نال نبڑن وچ مدد ملے گی۔ رنمیب یونیورسٹی دے چونگ یانگ انسٹی ٹیوٹ فارفنا نشل سڈیز دے ریسرچ فیلو لیویائی اینگ دی رائے وچ اقتصادی راہداری دے انفراسٹرکچر دی اُساری نال پاکستانی معیشت ترقی کرے گی تے نہ صرف چین تے پاکستان بلکہ خطے دے ہور ملکاں نوں وی فائدے ملے گا۔
اقتصادی راہداری دے روٹ دی اُساری نال گوادر، مغربی چین تے وچکارلے ایشیائی وچ موجود ریاستاں وچکار سامان تے تجارتی شیواں دی آوا جاوی دا سفری دورانیہ 60توں لےکے 70فیصد تک گھٹ ہو جائے گا۔ اقتصادی راہداری بارے پالیمانی کمیٹی دے چیئرمین تے سینیٹر مشاہد حسین سید نے آکھیا اے کہ سی پیک چین تے پاکستان دے بیلٹ اینڈ روڈ دی شروعات دے منصوبے دا علمبردار بن جائے گا جہدے نال کئی زمینی تے سمندری روٹس بنن گے جو کہ ایشیادے کئی ملکاں نوں آپس وچ جوڑن گے جدکہ گوادر بندرگاہ وچ بنیادی تے اہم محل وقوع کارن اہمیت اختیار کر جائے گی۔
