ریاض(پاکستان پوائنٹ نیوز01۔مئی2017ء) سعودی عرب وچ سکیورٹی فورسز نے پچھلے ورھے مدینہ منورہ وچ مسجد نبوی نیڑے آپ مارو حملے وچ ملوث دہشت گردی دے اک سیل نال جُڑے 46مشتبہ بندیاں نوں گرفتار کر لیا۔ غیر ملکی خبر رساں ادارے دے مطابق سعودی وزارت داخلا دے ترجمان میجر جنرل منصور الترکی نے دسیا کہ ایہناں مشتبہ بندیاں نوں سمندری شہر جدہ توں گرفتار کیتا گیا اے۔
ایہناں وچ سعودی شہریاں توں وکھ غیر ملکی شہری وی نیں۔ ترجمان نے دسیا کہ پچھلے دِنا ای ختم کیتے گئے الحرازات سیل نال جُڑے جنگجوواں توں تفتیش وچ ایہ گل ساہمنے آئی سی کہ ایہناں دادہشت گردی دیاں ہور کارروائیاں نال وی تعلق سی۔ دہشت گرداں نے مسجد نبوی وچ عبادت کرن والے لوکاں اُتے بارد نال بھری بیلٹ آپ مارو جیکٹ بمبار نوں دتی سی تے اوہدے راہیں مسجد نبوی دے احاطے وچ واقع پارکنگ ایریا وچ حملا آور نے دھماکا کیتا سی۔
اوہناں نے آکھیا کہ ایہ سیل جدہ وچ واقع ڈاکٹر سلیمان فقیہ ہسپتال دے احاطے وچ دہشت گردی دے واقعے وچ وی ملوث سی۔ ایس سیل نے اپنے ای اک رکن دا صرف ایس شبھے وچ سِر لاہ دتا سی کہ اوہ اپنے آپ نوں سکیورٹی فورسز دے حوالے کرن والا سی۔ تحقیقات توں ایہ گل دی تصدیق ہو گئی اے کہ ایہ مقتول بندا سعودی سی تے اوہ آپ مارو حملیاں وچ ورتے جان والی بارود نال بھریاں بیلٹس بنان دا ماہر سی۔ سعودی ترجمان دا کہنا سی کہ ایس سیل دیاں مجرمانا سرگرمیاں وچ ملوث ہون دے شبھے وچ ہن تک گرفتار کیتے گئے بندیاں دی گنتی 46 ہو گئی اے۔ گرفتار کیتے گئے بندیاں وچ 32سعودی تے چودھاں غیر ملکی نیں۔ ترجمان دے مطابق ایہناں غیر ملکیاں وچ پاکستانی، یمنی، افغانی، مصری، اردنی تے سودانی شامل نیں۔
