نویں دِلی(پاکستان پوائنٹ نیوز29۔اپریل2017ء) ائر انڈیا دی اُڈان راہیں نویں دِلی پہنچن والے رفیق نامی 39ورھیاں دے پاکستانی مسافر نے دعوا کیتا اے اوہ آئی ایس آئی دا ایجنٹ اے پر بھارت وچ رہنا چاہندا اے ۔ تفصیل دے مطابق آئی جی آئی ائر پورٹ اُتے دبئی توں دلی آن والی ائر انڈیا دی اُڈان وچ سوار پاکستانی مسافر نے آکھیا کہ ہیلو میں آئی ایس آئی دا ایجنٹ آں پر میں ہور ایہ کم نہیں کر سکدا تے ہن بھارت وچ ای رہنا چاہنا واں۔
محمد رفیق نے اُڈان توں لتھن مگروں ائر پورٹ دے ہیلپ ڈیسک اُتے موجود سوانی نوں بُلاندے ہوئے آکھیاکہ اوہ پاکستانی خفیہ ایجنسی آئی ایس ائی بارے کوئی معلومات دینا چاہندا اے۔ سوانی نے چھیتی نال پولیس نوں اطلاع دتی جہناں نے مسافر نوں گرفتار کر کے خفیہ ایجنسیاں دے حوالے کر دتا۔ 39ورھیاں دے محمد رفیق نے نویں دِلی توں گھٹمنڈ جانا سی پر گرفتاری کارن اوہ اگلی اُڈان وچ سوار نہ ہو سکیا۔ تفتیش دوران محمد رفیق نے آکھیا کہ اوہدا تعلق پاکستان دی خفیہ ایجنسی آئی ایس آئی توں اے تے اوہنے اک دن لئی بھارت رُکنا سی۔ محمد رفیق نوں نامعلوم تھاں اُتے منتقل کر دتا گیا اے جتھے کئی بھارتی ایجنسی اوہدے توں تفتیش کر رہیاں نیں۔
