(پاکستان پوائنٹ نیوز26۔اپریل2017ء) 5سو رُپئے مہینے توں 55لکھ مہینہ کمان والے بھارتی شہری دیو ددی کہانی نے سوشل میڈیا اُتے ساریاں نوں حیران کر دتا۔ تفصیل دے مطابق اپنے ایس سفر دی کہانی سناندے ہوئے دیو نے دسیا کہ میرے بالپنے توں ای میرے والد نوں پولیو سی۔ ایس لئی عمر دے پہلے حصے وچ ای میری زندگی ڈادھی مشکل سی۔ دیو نے دسیا کہ والد دی گھٹ آمدن دی وجہ توں مینوں 10ویں جماعت وچ ای اندازا ہو گیا کہ مینوں اپنی سکول دی فیس تے ہور خرچیاں دا بھار چکنا پئے گا۔
خرچیاں دا بھار چُکن لئی دیو نے ویٹر، کورئیر بوائے تے چیس کوچ دی حیثیت نال کم شروع کر دتا۔ 5سال تک دیو کالج نہیں جا سکیا تے کم وچ رُجھیا رہیا۔ دیونے دسیا کہ والد دے قرضیاں دی وجہ توں نوں اپنا فلیٹ وی ویچنا پیا۔ ستمبر 2015وچ اک شاگرد دے والد نے دیو نوں اک وار فیر پڑھن دا مشورا دتا جہدے اُتے عمل کردے ہوئے دیو نے محنت کیتی تے ٹیسٹ پاس کر کے داخلے قابل ہو گیا۔
دیو کول داخلے دی فیس تک دے پیسے نہیں سن پر خش قسمتی نال اک سپانسر نے دیو دی فیس دی پہلی قسط دتی تے بنک نے دیو نوں 10لکھ دا قرضا دے دتا۔ دیو دا کہنا اے کہ پچھلے دو سال اوہدی زندگی دے بہترین سال سن۔ اوہنے اپنی بچائی ہوئی ڈھائی لکھ دی رقم نال اپنے گھر والیاں دا خیال رکھیا۔ پڑھائی دے نال نال کئی مقابلیاں وچ حصہ لے کے کیش انعام وی جتیا۔ دیو دا کہنا سی کہ اپنی کہانی دسن دا مقصد صرف ایہ سی کہ اوہ لوک جو زندگی وچ ہمت ہار جاندے نیں اوہناں نوں چاہیدا کہ اوہ لگاتار محنت کرن تاں جے اپنے خاباں نوں پورا کر سکن۔
