فلاڈلفیا(پاکستان پوائنٹ نیوز25۔مارچ2017ء) امریکی ماہرین نے اپنی تحقیق وچ آکھیا اے کہ جہڑے بندے وقفے وقفے نال اعتکاف تے تنہائی وچ عبادت کردے رہندے نیں اوہناں دی دماغی صحت چنگی رہندی اے تے اوہ ڈپریشن سنے بے چینی تے ذہنی تھکاوٹ دا شکار وی شکار نہیں ہوندے۔ فلاڈلفیا دی تھامس جیفرسن یونیوسٹی وچ ماہرین دی ٹیم نے 24توں 76سال دے 14رضا کاراں اُتے ایہ مطالعہ کیتا جہدے نتیجے ریسرچ جرنل ”ریلیجن‘ برین اینڈ بیہیویئر“وچ چھپے نیں۔
مطالعے دوران سارے رضا کاراں نوں 7دن ’روحانی تربیتی پروگرام‘ وچ رلتی کیتا گیا جدکہ پروگرام شروع ہون توں پہلے تے مگروں اوہناں دے دماغاں وچ سیروٹونین تے ڈوپامین نامی ماذواں دا جائزا لتا گیا، اوہناں وچ ڈوپامین دا تعلق جذبات تے اکتسابی (سیکھن دی) صلاحتاں نال اے جدکہ سیروٹونین ساڈے جذبات تے موڈ نوںکنٹرول رکھدا اے، دماغ وچ ای ایہناں دوویں ماذواں دی کمی بیشی ساڈی جذباتی کیفیت، موڈ تے سمجھن سمجھان دی صلاحیت اُتے اثر انداز ہوندی اے۔
ڈوپامین تے سیروٹونین دی دماغی ماترا وچ کمی بیشی تے اوہناں دے تعلق رکھن والے خلیاں (ریسیپٹرز) وچ سرگرمی دا جائزا لین لئی جدید آلات (برین سکیننگ ڈیوائسز) کیتے گئے۔ 7دِنا روحانی تربیتی پروگرام لنگھان مگروں اوہناں رضا کاراں دے دماغاں دا معائنا کیتا گیا تے اوہناں توں جذباتی کیفیت تے موڈ وغیرا بارے سوال وی کیتے گئے۔نویں مطالعے وچ واضح کیتا گیا اے کہ روحانی سرگرمیاں کس طرحاں ساڈی دماغی صحت اُتے چنگا اثر پاندیاں نیں تے سانوں ڈپریشن، بے چینی تے دماغی تھکاوٹ ورگیاں علامتاں توں دور رکھدیاں نیں۔ چیتے رہوے کہ دنیا دے تقریبن ہر مذہب وچ اعتکاف تے تنہائی وچ عباد ت کرن دا تصور ہے اے جہنوں نفسیات دی اصطلاح وچ ’روحانی پسپائی‘ آکھیا جاند ااے۔
