ممبئی(پاکستان پوائنٹ نیوز21۔مارچ2017ء) نوکری دا جھانسہ دے کے سعودی عرب وچ جنسی کاروبار لئی ویچی گئی بھارتی سوانی نوں بازیاب کروا لیا گیا۔ دوجے پاسے ایہ خدشا ظاہر کیتا جا رہیا اے کہ بھارت وچ انسانی سمکنگ وچ ملوث بندے اپنے کاروبار نوں ہور ودھوتری دے رہے نیں۔ غیر ملکی خبر رساں ادارے نے بھارتی عہدیداراں دے حوالے نال دسیا کہ سوانی نوں نوکری دا جھانسہ دے کے ویچن والے اک ایجنٹ نوں بھارتی ریاست گجرات تے اک نوں ممبئی توں گرفتار کر لیا گیا جدکہ ہور ایجنٹس دی گرفتاری لئی چھاپے مارے جا رہے نیں۔
عہدیدار دے مطابق اک سال پہلے 35ورھیاں دی سوانی نوں 600ڈالر مہینہ وار تنخاہ اُتے نوکری دوان دا وعدا کر کے دبئی لیاندا گیا سی۔ خبر رساں ادارے دے مطابق بھارت دے مملکتی وزیر نے دسیا کہ سوانی نوں سعودی عرب دے شہر ریاض وچ اک ہور مالک نوں ویچیا گیا، جتھے اوہنوں تشدد تے ریپ دا نشانا بنایا جاندا رہیا۔ مملکتی وزیر دے مطابق بازیاب کرائی گئی سوانی دا ریاست گجرات دے اک ہسپتال وچ علاج جاری اے۔
