بیجنگ(پاکستان پوائنٹ نیوز13۔مارچ2017ء) چین ہور ملکاں دی مدد نال ’برکس پلس‘ دے ناں توں نواں اتحاد قائم کرنا چاہندا اے۔ چین دا تنظیم وچ 11ملکاں نوں رلت کرن دا پلان اے، ایہناں ملکاں وچ پاکستان، بنگلا دیش،سری لنکا، ایران، نائیجیریا، کوریا، میکسیکو، انڈونیشیا، ترکی، فلپائن تے ویتنام شامل نیں۔ چین دے وزیر خارجا وانگ ای نے آکھیا اے کہ دوجے وڈے ترقی پذیر ملکاں دے نال رابطے ودھا کے برکس پلس لئی طریقا کار طے کراں گے۔
اوہناں دا کہنا سی کہ اسیں وڈی شراکت داری راہیں اپنے دوستاں وچ وادھا کر سکدے آں تے ایہدے لئی سارے ملک راضی نیں۔ چین چالو ورھے برکس دا صدر اے تے چین ستمبر وچ ہون والے اجلاس دی صدارت وی کرے گا۔ تجزیا کاراں دے مطابق چین اپنے اتحادیاں نوں سَد کے اپنے اثرو رسوخ نوں ودھان دی کوشش کر رہیا اے تے ایس کم نال برکس تے عالمی سیاست وچ بھارت تے ہور ارکان دے کردار وچ تبدیلی آسکدی اے۔
یاد رہوے کہ برکس کلب 5ملک برازیل، بھارت، چین تے جنوبی افریقا اُتے مشتمل اے۔ نویں اتحاد نال بھارت دے تعلقات اپنے برکس پارٹنرز نال متاثر ہون دا خدشا اے کیونکہ اوہدی توسیع مگروں بھارت لئی پاکستان نوں تنقید دا نشانا بنانا آسان نہیں ہووے گا، چین لئی سیاسی فارم وچ وادھا وی ہووے گا۔ آن والے ورھے اجلاس وچ چین بیجنگ نواز ملکاں جیویں کہ پاکستان، سری لنکا تے میکسیکو نوں بُلایا جائے گا۔
چین نوں دو بالاں دی پالیسی نے چنگے نتیجے دِتے نیں۔ ایہ پالیسی 2020تک چین دی خشحال نمو وچ وادھا دی وجہ ہووے گی۔ چین برکس نوں چائنا سینٹر دی آرگنائزیشن وچ بدل سکدا اے جیویں کہ شنگھائی تعاون تنظیم اے۔ یاد رہوے کہ برکس دا 2016وچ اجلاس گوا وچ ہویا سی جہدے وچ بھارت ولوں پاکستان نوں اکلیاں کرن دی کوشش کیتی گئی سی پر چین نے بھارت دی کوشش نوں ناکام بنا دِتا سی۔
