دوحہ(پاکستان پوائنٹ نیوز09۔مارچ2017ء) ایران دے وزیر خارجا محمد جواد ظریف نے قطر دے امیر شیخ تمیم بن حمد آل ثانی نال ملاقات کیتی، دوحہ اندر ہون والی ایس ملاقات وچ ایران تے قطر وچکار تعلقات بارے وچار وٹاندرا کیتا گیا۔ نیوز ایجنسی ارنا دے مطابق ایران دے وزیر خارجا محمد جواد ظریف تے امیر قطر شیخ تمیم بن حمد آل ثانی نے تہران تے دوحہ وچکار تجارتی تے اقتصادی تعلقات دے فروغ اُتے زور دِتا۔
ایس ملاقات وچ اہم علاقائی معاملات اُتے وی وچار وٹاندرا کیتا گیا۔ ایران دے وزیر خارجا نے اپنے اک دِنا دورا قطر وچ وزیر خارجا خالد بن عطیہ نال وی ملاقات کیتی۔ چیتے رہوے کہ ایس توں پہلے ایران دے وزیر خارجا نے جولائی دو ہزار پندرھاں وچ قطر دا دورا کیتا سی جہدے وچ دو پاسی تعاون، علاقائی و بین الاقوامی مسائل تے دہشت گردی خلاف کارروائیاں بارے وچار وٹاندرا کیتا گیا سی۔
