مکہ(پاکستان پوائنٹ نیوز17۔فروری2017ء) پچھلے دِنا حرم مکہ وچ دُکھ بھریا واقعہ اوس ویلے پیش آیا جدوں اک سعودی شہری نے اپنے آپ نوں اگ لان دی کوشش کیتی پر اوتھے طواف کرن والے شہری نے اوہنوں گرفتار کرلیا تے اوہدی جان بچ گئی۔ بعد وں تحقیقات مگروں پتا چلیا اے کہ سعودی شہری ذہنی معذور سی۔ ہن ایہ سارا معاملا ہون مگروں اوس سعودی شہری دی ماں وی بول پئی اے۔
سعودی شہری دی ماں اُم محمد نے سعودی اخبار ’المدینہ‘ نوں دسیا کہ میرے خاوند دے مرن مگروں اوہدی ساری جائیداد اوہدے رشتے داراں نے ہڑپ کر لئی۔ میرا پُتر اپنے پیو نال کم کردا سی کیونکہ اوہدے کول کوئی نوکری نہیں سی ایس لئی اوہنے پیو نال کم کرنا شروع کر دِتا پر پیو دی وفات مگروں اوہدی ساری جائیداد اوہدے پیو دے رشتے داراں نے ہڑپ کر لئی۔پیو دے مرن مگروں رشتے داراں نے عدالتوں وی اپنے حق وچ فیصلا کروا لیا۔
سعودی نوجوان دی ماں نے اک ہور انکشاف کیتا کہ اوہدے پُتر نے ایس توں پہلے وی خدکشی کرن دی کوشش کیتی سی۔ اُم نے دسیا کہ کُجھ مہینے پہلے جدوں عدالت نے رشتے داراں دے حق وچ فیصلا دِتا تے اوہنوں ڈاڈھا دُکھ ہویا جہدے مگروں پُتر نے اپنے آپ نوں عدالت دے احاطے وچ وی اگ لان دی کوشش کیتی سی۔ اُم محمد نے اپنے پُتر دا پچھلا ڈاکٹری معائنا وی پولیس حکام نوں پیش کر دِتا اے۔ یاد رہوے کہ سعودی شہری دا طائف دے ذہنی معذوراں دے ہسپتال وچ وی علاج ہوندا رہیا اے جو پچھلے تن مہینیاں توں جاری سی۔
