فریال نوں غیر شرعی کپڑے پان توں روکیا سی، تشدد دا الزام غلط اے: باکسر عام خان دے ماں پیو دا بیان

لندن(پاکستان پوائنٹ نیوز13۔دسمبر2016ء) پاکستانی نژاد برطانوی باکسر عامر خان دے ماں پیو نے چُپ توڑ دے ہوئے فریال ولوں لائے گئے الزاماں دا جواب دے دِتا۔ تفصیل دے مطابق باکسر عامر خان دے ماں پیو دا کہنا سی کہ فریال جھوٹھی اے، اسیں اوہنوں کدی نہیں ماریا، عامر نے اپنے سوہریاں دا ہمیشہ احترام کیتا اے، فریال وی اپنے سوہریاں دا احترام کرے۔ عامر خان دے والد سجاد خان دا کہنا سی کہ ایس گل وچ شک نہیں اے کہ ہر فیملی وچ وادھا گھاٹا ہو جا ندا اے پر اسیں عامر تے اوہدی بیوی فریال وچکار ہمیشہ صلح دی کوشش کیتی تے ایہ کوئی احسان نہیں اے، ماں پیو ہون دے ناطے اپنا فرض نبھایا اے تے ہمیشہ عامر دی بہتری سوچی۔ اوہناں نے عامر خان دی دھی دی ویکھ بھال بارے فکر مندی دا اظہار کردے ہوئے آکھیا کہ لمیسہ خان ساڈی پیاری پوتری اے تے اوہدی ویکھ بھال ہمیشہ توں بہت اہم اے، لمیسہ دی ماں دے جان توں بعد ساڈے لئی پچھلے 5دن لنگھانا ڈاڈھا مشکل رہیا۔ اک سوال دے جواب وچ اوہناں نے آکھیا کہ فریال دے سارے الزامات غلط نیں، اسیں اوہنوں غیر شرعی کپڑے پان اُتے ٹوکیا سی، جے اوہ سچی سی تے اسیں اوہدے اُتے تشد کیتا تے اوہنے ہسپتال توں اج تیکر ٹیسٹ کیوں نہیں کروایا تے پولیس وچ کوئی رپورٹ درج کیوں نہیں کروائی؟ اوہناں دا کہنا سی کہ فریال دے سوالاں دا جواب دین لئی میرے تے میری فیملی کول کُجھ نہیں اے۔باکسر دی والدا دا کہنا سی کہ اوہناں نے فریال نوں سِر اُتے لیڑا لین دا آکھیا سی پر جدوں اوہنے میری گل سنن توں انکار کر دِتا میں وی اوہنوں آکھنا چھڈ دِتا۔ یاد رہوے کہ باکسر عامر خان دی بیوی فریال نے سوشل میڈیا اُتے اپنے پیغام وچ الزام لایا سی کہ اوہدی ننان، سس تے سوہرا اوہدے اُتے تشدد کردے نیں تے اپنی مرضی دے کپڑے پان دی اجازت وی نہیں دیندے، بعد وچ اوہ لندن توں امریکا اپنے ماں پیو کول چلے گئیاں سن۔