کوئٹہ(پاکستان پوائنٹ نیوز06۔جولائی2017ء) پاکستانی دھی نے ملک دا ناں فخر نال اُچا کر دتا۔ تفصیل مطابق ناز گل بلوچ اوہی پاکستان دی دھی اے جہنے پچھلے دِنا ہون والی انٹرنیشنل کراٹے چیمپئن شپ وچ پاکستان دا ناں تے مقام دوویں فخر نال اُچے کردتے پر ادُکھ والی گل ایہ اے کہ ایہنوں نہ تے کسے میڈیا چینل نے کوریج دتی تے نہ ای کسے پلیٹ فارم اُتے ایہدی سلاہنا کیتی گئی۔
ناز گل بلوچ نے انٹرنیشنل چیمپئن شپ ، جہدے وچ کئی ملکاں نے حصہ لیا گولڈ میڈل حاصل کیتا۔ سوانی پلیئر دا تعلق کوئٹہ توں اے تے ناز گل نے اوتھوں ای ایس کھیڈ دی شروعات کیتی۔ اک پاسے جتھے سوشل میڈیا اُتے ناز گل بلوچ دی کامیابی نوں سلاہیا جا رہیا اے اوتھے دوجے پاسے لوک پاکستانی میڈیا اُتے تنقید وی کر رہے نیں۔ لوکاں دا کہنا اے کہ پاکستانی میڈیا نوں کرکٹ توں ویہل ملے تے اوہدا دھیان ناز گل ورگی پاکستانی دھی اُتے پئے۔ مشہور سنگر و اداکار علی ظفر نے ناز گل دی کامیابی نوں اپنے ٹویٹر اکاﺅنٹ اُتے سلاہندے ہوئے پاکستانی میڈیا اُتے تنقید وی کیتے جہنے ایس دھی دا ناں تیکر نہیں لیا۔
