دبئی(پاکستان پوائنٹ نیوز23۔جنوری2017ء) افغانستان دے اوپننگ بلے باز محمد شہزاد نے ریکارڈ بک وچ انوکھا ریکارڈ اپنے ناں درج کرواندے ہوئے اک ای دن وچ دو انٹرنیشنل ففٹیاں بنان دا انوکھا ریکارڈ بنا دِتا۔ تفصیل دے مطابق متحدہ عرب امارات وچ کھیڈے جان والے ڈیزرٹ ٹی ٹونٹی ایونٹ دے سیمی فائنل وچ عمان خلاف 150سکور دے جواب وچ شہزاد نے 60گینداں اُتے 80سکور کر کے ٹیم نوں جتوایا۔
آئرلینڈ نے سیمی فائنل وچ 90سکور نال سکاٹ لینڈ نوں ہرا کے اپنے آپ نوں فائنل لئی فیورٹ ثابت کیتا تے افغانستان لئی خطرے دی گھنٹی وجادِتی پر آئر لینڈ دی ٹیم 14ویں اوور وچ صرف 71سکور بنا کے آﺅٹ ہو گئی جہدے بعد شہزاد دا ریکارڈ خطرے وچ پیندا نظر آیا پر اوپننگ بلے باز نے صرف 40گینداں اُتے ففٹی بنا کے اپنی ٹیم نوں 8ویں اوور وچ ای جتوا دِتا۔ ٹیم نوں جتوان دے نال نال افغان کھڈاری اک ای دن وچ دو انٹرنیشنل میچاں وچ دو ففٹیاں بنان والا دنیا دا پہلاکھڈاری بن گیا۔
