کیپ ٹاﺅن(پاکستان پوائنٹ نیوز17۔جنوری2017ء) جنوبی افریقا دے سٹار بیسٹمین تے سابق ٹیسٹ کپتان براہم ڈیویلیئرز دا دل ٹیسٹ کرکٹ توں بھر گیا اے، امکان اے کہ اوہ ٹیسٹ کرکٹ نوں چھڈ کرکے ون ڈے کرکٹ اُتے پوری توجہ دین گے۔ غیر ملکی میڈیا دے مطابق ڈویلیئرز دے ایس سلسلے وچ کرکٹ ساﺅتھ افریقا نال مذاکرات جلدی ہون دی امید اے، 32ورھیاں دے سپر سٹار پچھلے کجھ مہینیاں توں کُہنی دی انجری دا شکار نیں۔
اوہناں نے ایس دوران ٹیسٹ ٹیم دی قیادت وی چھڈ دِتی پر ون ڈے سائیڈ دی کپتانی اجے وی اوہناں کول اے، ہن اوہ فٹنس حاصل کر کے ڈومیسٹک کرکٹ وچ واپس آ گئے نیں۔ امکان اے کہ اوہ سری لنکا خلاف ٹی ٹونٹی سیریز توں پہلے انٹرنیشنل کیریئر دوبارا شروع کرن گے۔ پروٹیز ٹیم دے کوچ رسل ڈومنگو دے مطابق سانوں ڈویلیئرز نال اوہدے مستقبل بارے گل بات کرنی ہووے گی کہ اوہ ایس حوالے نال کیہ چاہندے نیں تے اوہدا فیصلا ڈیویلیئرز نے ای کرنا اے۔
