میلبورن(پاکستان پوائنٹ نیوز29۔دسمبر2016ء) باکسنگ ڈے ٹیسٹ دے چوتھے دن پاکستان دے 443سکور دے جواب وچ آسٹریلیا نے کھیڈ ختم ہون تیکر 6وکٹاں دے نقصان اُتے 465سکور بنا کے گرین شرٹس دی پہلی اننگز دی سبقت ختم کر دِتی اے۔ تفصیل دے مطابق میلبورن کرکٹ گراﺅنڈ وچ جاری دوجے ٹیسٹ میچ دے چوتھے دیہاڑے آسٹریلیا نے چاہ دے وقفے تیکر 6وکٹاں دے نقصان اُتے جدوں 465سکور بنا کے پاکستان اُتے 22سکور دی سبقت حاصل تے امپائرز نے خراب موسم پاروں ویلے توں پہلے چاہ دا وقفہ لیا پر موسم وچ بہتری نہ آن دی وجہ توں کھیڈ ختم کر دِتا گیا، آسٹریلوی کپتان سٹیو سمتھ 100سکور بنا کے وکٹ اُتے موجود سن۔
پچھلے دیہاڑے شاندار بیٹنگ دا وکھالا کرن والے عثمان خواجا نروس نائنٹیز دا شکار ہو کے 97سکور اُتے وہاب ریاض دی گیند اُتے سرفراز احمد ہتھوں کیچ آﺅٹ ہوئے، پہلے میچ وچ سنچری بنان والے بینڈ سکومب 54سکور بنا کے سہیل خان دی گیند اُتے سمیع اسلم ہتھوں آﺅٹ ہوئے، نک میڈننس 22سکور کر کے یاسر شاہ دا شکار بنے جدکہ میتھو ویڈ وی 9سکور نال سہیل خان دی گیند اُتے آﺅٹ ہوئے۔ ایس توں پہلے پاکستان نے اپنی پہلی اننگز 443سکور 9کھڈاری آﺅٹ اُتے ڈیکلیئر کر دِتی سی جہدے وچ اظہر علی دے 205سکور وی شامل سن جدکہ سہیل خان نے وی 65سکور کیتے سن۔
