دبئی(پاکستان پوائنٹ نیوز22۔دسمبر2016ء) قومی ٹیسٹ ٹیم دے کپتان مصباح الحق نے 2016لئی آئی سی سی سپرٹ آف کرکٹ ایوارڈ جِت لیا اے۔ تفصیل دے مطابق انٹرنیشنل کرکٹ کونسل ولوں جاری بیان دے مطابق 42ورھیاں دے مصباح الحق نوں ایہ ایوارڈ فیلڈ اُتے اوہناں دے بہترین رویے دی وجہ توں دِتا گیا اے۔ ایوارڈ جِتن اُتے مصباح الحق نے خشی دا وکھالا کردے ہوئے آکھیا اے کہ ساڈی ٹیم نے ہمیشہ مثبت ذہن نال کرکٹ کھیڈی اے۔
اوہناں دا ہور کھڈاریاں نوں پیغام وچ کہنا سی کہ جے تُسیں اپنی فٹنس برقرار رکھن دے نال نال پرفارمنس دیو تے ودھدی عمر وی تہانوں کامیابیاں حاصل کرن توں نہیں روک سکدی۔ دوجے پاسے جنوبی افریقا دے ماریس ایمرسمس 2016لئی آئی سی سی دے بہترین امپائر قرار پائے۔ یاد رہوے کہ آئی سی سی سپرٹ ایوارڈ 2011وچ مہندر سنگھ دھونی، 2012وچ ڈینئل ویٹوری، 2013وچ مہیلا جے وردھنے تے 2015وچ برینڈن میکولم نوں ملیا سی، مصباح الحق دی قیادت وچ قومی ٹیم نے چالو ورھے ستمبر وچ آئی سی سی ٹیسٹ رینکنگ وچ پہلی پوزیشن حاصل کیتی سی۔
