لاہور(پاکستان پوائنٹ نیوز30۔نومبر۔2016ء) پاکستان کرکٹ بورڈ (پی سی بی) نے ٹیسٹ ٹیم دے کپتان مصباح الحق نوں گھٹو گھٹ 2018تیک قیادت جاری رکھن دی درخاست کر دِتی۔ تفصیل دے مطابق اپنے اک انٹرویو وچ چیئرمین پی سی بی شہریار خان نے آکھیا کہ مصباح الحق اپنے مستقبل دے حوالے نال فیصلے لئی آزاد نیں پر پی سی بی 2018 تیک جاری رکھن دی تجویز دے چکی اے۔ شہریار خان دا کہنا سی کہ مصباح اپنی شاندار فٹنس پاروں اگلے کُجھ ورھیاں تیک بین الاقوامی کرکٹ آسانی نال کھیڈ سکدے نیں، اوہ تحمل مزاج، پڑھے لکھے، متوازن تے ٹیم وچ اوہناں دا بڑا احترام اے۔
اوہناں دا کہنا سی کہ ساڈے ذہن وچ کُجھ ناں نیں جو مصباح الحق دے نمائندگی چھڈ جان دے بعد ٹیم دی قیادت کرن گے پر سانوں فیصلاکرن توں پہلے اوہناں دا تفصیلی جائزا لین دی لوڑ اے۔چیئرمین پی سی بی نے آکھیا کہ اظہر تے سرفراز دوویں چنگے کھڈاری نیں پر جدوں وی اوہ پہلے نمبر اُتے بیٹنگ کردے نیں تے اوہناں دی کارکردگی خراب ہوندی اے، آل راﺅنڈر عماد وسیم وی امیدوار ہو سکدے جیویں کہ اوہناں نے میچاں دے مشکل ویلیاں وچ دباءاُتے قابو کرن دی قابلیت نال پی سی بی نوں متاثر کیتا اے۔
شہریار خان نے آکھیا کہ سلمان بٹ تے محمد آصف دویں فرسٹ کلاس میچاں وچ رلت دے بعد پاکستان ٹیم دے انتخاب دے اہل سن تے ٹیسٹ لئی فیصلا سلیکٹرز دا سی، لیگ سپنر دانش کنیریا، سلمان، آصف تے محمد عامر دے حوالے نال مختلف رویہ اپنان بارے پُچھے گئے سوال دے جواب وچ اوہناںد ا کہنا سی کہ کنیریا اُتے پابندی انگلینڈ اینڈ ویلز کرکٹ بورڈ (ای سی بی) نے عائد کیتی سی، پی سی بی تے ہور بورڈ ہُن ایس فیصلے اُتے عملدرآمد دے پابند نیں پر مینوں کنیریا نال ہمدردی اے تے میں سمجھنا واں کہ اوہناں نوں انصاف لئی سی سی بی ساہمنے اپیل کرنی چاہیدی۔
