نویں دِلی(پاکستان پوائنٹ نیوز21۔اگست۔2018ء) بھارتی کرکٹ ٹیم دے سابق اوپننگ بلے باز نوجوت سنگھ سدھو نے اپنے پاکستانی دورے اُتے تنقید کرن والے انتہا پسند بھارتیاں نوں کرارا جواب دے دتا۔ اوہناں دا کہناسی کہ جیہڑے میرے پاکستان جان اُتے اعتراض کردے اوہ دسن کہ کیہ نریندر مودی نواز شریف نوں صرف جپھی پان لئی پاکستان گئے سن؟بھارتی میڈیا نال گل بات کرد ے ہوئے نوجوت سنگھ سدھو دا کہنا سی کہ پاکستان کوئی نومین لینڈ نہیں اوتھے وی لوک وسدے نیں۔
میرے اُتے تنقید کرن والے دسن کہ بی جے پی دے وزیر اعظم نریندر مودی کیہ نواز شریف نال صرف جپھی پان گئے سن؟اٹل بہاری واجپائی وی امن دا سنیہا لے کے ای پاکستان گئے سن۔ میں بھارت دا سفیر بن کے گیا سی تے بھارت وچ ای میرے اُتے تنقید ہو رہی اے۔ اوہناں دا کہنا سی کہ ویزا ملن اُتے وزیر خارجا سشما سوراج نے آپ فون کر کے آکھیا کہ تہانوں پاکستان جان دی اجازت مل گئی اے۔
نوجوت سنگھ سدھو دا ہور کہنا سی کہ خون خرابے نال دوویں ملکاں نوں کیہ فائدہ ہوئے گا۔ بہتر تعلقات وچ فائدہ اے ۔ دوویں ملکاں وچ امن ہوئے تے سرحد اُتے فوج رکھن دی ضرورت نہیں پئے گی۔ اوہناں دا کہنا سی کہ پاکستان وچ اینا پیار ملیا، تاثر وی نہیں سی کہ ساڈے وچکار دشمنی اے۔ عمران خان نے مینوں گلے لا کے آکھیا کہ تُسیں بہت بہادر او۔ اوہناں نے بھارتی کھڈاریاں لئی دوستی دا سنیہا گھلیا اے۔
سدھو دا ہور کہنا سی کہ صرف جنرل باجوہ ای نہیں باقی سبھ نے وی مینوں گلے لایا۔ جنرل باجوہ ولوں کرتار پور دا راہ کھولن دا سُن کے اکھاں وچ اتھرو آگئے۔ یاد رہوے کہ عمران خان نے اپنی وزارت عظمی دی حلف برداری تقریب وچ کپل دیو، سنیل گواسکر تے نوجوت سنگھ سدھو نوں آن دی دعوت دتی سی پر کپل دیوتے سنیل گواسکر نے پاکستان آن توں معذرت کر لی پر نوجوت سنگھ سدھو بھارت وچ ڈاڈھی مخالفت مگروں وی پاکستان آئے سن۔
