کراچی(پاکستان پوائنٹ نیوز20۔اگست۔2018ء) پاکستان تے بھارت وچکار ایشیاء کپ دے مقابلے دی تاریخ نوں نہ بدلن دا اعلان کر دتا گیا۔ شیڈول مطابق ٹاکرا 19ستمبر نوں ہوئے گا۔ پچھلے دیہاڑے میڈیا رپورٹس مطابق بھارتی کرکٹ بورڈ نے تصدیق کیتی اے کہ 19ستمبر نوں کھیڈے جان والے میچ دی تاریخ نوں بدلیا نہیں جائے گا۔ یاد رہوے کہ بھارت نوں 18تے 19ستمبر نوں لگاتار دو میچ کھیڈنے پین گے جیہدے اُتے سابق بھارتی کھڈاریاں نے ڈاڈھے تحفظات دا وکھالا کیتا سی۔
اوہناں نے منگ کیتی کہ ٹورنامنٹ وچ روایتی حرفیاں وچکار ہون والے مقابلے دی تاریخ نوں بدل جائے ۔ کئی کھڈاریاں داتے ا یہ وی آکھنا سی کہ پاکستان نال میچ ای نہ کھیڈیا جائے۔ اطلاع آئی سی کہ بی سی سی آئی پاکستانی ٹیم خلاف میچ دی تاریخ نوں بدلن لئی ایشین کرکٹ کونسل نوں آکھے گا پر چیف آپریٹنگ افسر راہول جوہری نے پچھلے دیہاڑے وضاحت کر دتی کہ دوویں ٹیماں وچکار میچ دے شیڈول وچ کوئی تبدیلی نہیں ہوئے گی۔
پاک بھارت ٹاکرے لئی ٹکٹاں دی فروخت وی اج توں شروع ہو گئی اے۔ میچ لئی ٹکٹ دی قیمت 20درہم توں لے کے 750درہم تیکر رکھی گئی اے۔ شائقین لئی ٹکٹ ابوظہبی کرکٹ سٹیڈیم تے دبئی انٹرنیشنل سٹیڈیم توں ملن گیاں۔ ایونٹ وچ پاکستان، بھارت، افغانستان، سری لنکا تے بنگلا دیش دیاں ٹیماں رلتی ہون گیاں تے ایونٹ دے سارے میچ ڈے اینڈ نائٹ ہون گے۔ایشیاء کپ دی شروعات 15 ستمبر نوں بنگلا دیش تے سری لنکا دیاں ٹیماں وچکار میچ نال ہوئے گی جدکہ متحدہ عرب امارات وچ ہون والے ایونٹ دا فائنل 28ستمبر نوں دبئی انٹرنیشنل کرکٹ سٹیڈیم وچ ہوئے گا۔
