نویں دِلی(پاکستان پوائنٹ نیوز04۔اپریل2018ء) بھارتی کرکٹ ٹیم دے کپتان ویرات کوہلی وی قومی ٹیم دے سابق کپتان شاہد آفریدی دے مقبوضہ کشمیر بارے بیان اُتے اوہناں دی حمایت وچ ساہمنے آگئے نیں۔ تفصیل مطابق مقبوضہ کشمیر وچ بھارتی فوج نے ایتوار نوں فائرنگ کر کے 17کشمیری نوجواناں نوں ہلاک کر دتا سی، جیہدے مگروں مقبوضہ وادی وچ دوجے دیہاڑے وی ہڑتال جاری رہی جدکہ کئی علاقیاں وچ کرفیو وی لا دتا گیا۔
ایس دُکھ دی گھڑی وچ دنیا بھر دے مسلماناں نے بھرپور احتجاج کیتا جیہدے مگروں قومی ٹیم دے سابق کپتان شاہد آفریدی وی چُپ نہ رہ سکے تے اوہناں نے اقوام متحدہ سنے عالمی اداریاں توں واقعے دا نوٹس لین دی منگ کیتی۔ سوشل میڈیا ویب سائٹ ٹویٹر اُتے اپنے پیغام وچ شاہد آفریدی دا کہنا سی کہ مقبوضہ کشمیر وچ تشویشناک صورتحال ویکھن وچ آ رہی اے، آزادی تے حق خودارادیت لئی آواز چُکن والے معصوم شہریاں نوں ظالم حکومت ولوں شہید کیتا جا رہیا اے۔
حیرانی اے کہ اقوام متحدہ تے ہور بین الاقوامی ادارے کتھے نیں تے اوہ ایس خونی کھیڈ نوں روکن لئی کیوں اقدامات نہیں کر رہے؟آفریدی دے ایس بیان اُتے بھارتی میڈیا نے اپنی قومی کرکٹ ٹیم دے کپتان ویرات کوہلی نوں ایس بارے اوہناں دے خیال جانن لئی رابطہ کیتا تے اوہناں دا کہنا سی کہ کسے خاص مسئلے اُتے اپنے خیالاں دا اظہار کرنا ہر بندے دا اپنا ذاتی فیصلا اے جدوں تیکر مینوں کسے واقعے بارے پوری طرحاں پتا نہیں میں اوہدے اُتے گل نہیں کراں گا پر ہمیشہ تہاڈا ملک تہاڈا سبھ توں پہلا انتخاب ہوندا اے۔
