کراچی کنگز نے سہیل خان دے بدلے محمد رضوان نوں ٹیم دا حصہ بنالیا

کراچی(پاکستان پوائنٹ نیوز05۔اکتوبر2017ء) کراچی کنگز نے سہیل خان دے بدلے محمد رضوان نوں ٹیم دا حصہ بنا لیا اے۔ پیسر ہن لاہور قلندرز دی نمائندگی کرن گے۔ پی ایس ایل دے تیجے ایڈیشن لئی فرنچائز ولوں کھڈاریاں دا جوڑ توڑ جاری اے۔ کراچی کنگز تے لاہور قلندرز وچکار کھڈاریاں دے وٹاندرے دا سمجھوتا ہویا اے۔ سمجھوتے مطابق وکٹ کیپر و بیسٹمین محمد رضوان نوں کنگز جدکہ اوہناں دے بدلے وچ سہیل خان نوں لاہور قلندرز وچ شامل کر لیا گیا اے۔ سہیل خان پی ایس ایل دے دوجے سیزن وچ سبھ توں ودھ وکٹاں لین والے باؤلر رہے سن۔ ایس ڈیل دے تحت گولڈ کیٹگری وچ کراچی نوں سبھ توں پہلے جدکہ لاہور قلندرز نوں 5ویں نمبر اُتے کھڈاری منتخب کرن دا حق حاصل ہوئے گا۔