لاہور(پاکستان پوائنٹ نیوز28۔ستمبر2017ء) قومی کرکٹر ٹیم دے ہیڈ کوچ مکی آرتھر اُتے الزام لان والے عمر اکمل اُتے تن میچاں دی پابندی دے نال نال 10لکھ رُپئے جرمانہ کیتا گیا اے۔ وسیلیاں مطابق پی سی بی دی تحقیقاتی کمیٹی نے کوڈ آف کنڈکٹ دیاں 3شقاں دی خلاف ورزی اُتے کرکٹر نوں تن میچاں دی پابندی دے نال نال جرمانہ کرن دی سفارش کیتی سی جہدے اُتے اج چیئرمین پی سی بی نجم سیٹھی نے ایہناں سفارشاں دی منظوری دیند ے ہوئے 27ورھیاں دے کرکٹر اُتے 3میچاں دی پابندی دے نال نال 10لکھ رُپئے جرمانہ وی کیتا اے۔
تن میچاں دی پابندی دا اطلاق ڈومیسٹک و انٹرنیشنل مقابلیاں اُتے ہوئے گا جدکہ وسیلیاں مطابق عمر اکمل دو مہینیاں تیکر کسے لیگ وچ وی رلت نہیں کر سکن گے۔ چیئرمین پی سی بی نجم سیٹھی دا کہنا سی کہ عمر اکمل نوں سزا دینا اک مشکل فیصلا سی پر ایہ سزا دوجیاں لئی مثال اے۔ یاد رہوے کہ عمر اکمل نے الزام لایا سی کہ ہیڈ کوچ مکی آرتھر نے اوہناں نوں گالھاں کڈھیاں تے این سی اے وچ پریکٹس کرن توں روکیا۔
جہدے مگروں پہلے کرکٹر نوں شوکاز نوٹس گھلیا گیا۔پی سی بی ایس جواب توں مطمئن نہ ہویا تے دوجا شوکاز نوٹس گھلیا گیا جہدے وچ اوہناں توں اک سوال دی وضاحت منگی گئی کہ اوہناں نے کوچ خلاف بیان بازی کر کے ضابطہ اخلاق دی خلاف ورزی کیوں کیتی؟ جواب وچ عمر اکمل نے کوچ خلاف پریس کانفرنس نوں غصے دا نتیجہ قرار دتا سی۔
