لاہور(پاکستان پوائنٹ نیوز28۔اگست2017ء) عمران خان نے ورلڈ الیون دے دورہ پاکستان دی حمایت کیتی اے۔ تفصیل مطابق اگلے مہینے شیڈول پاکستان دے دورہ ورلڈ الیون دے حوالے نال تحریک انصاف دے سربراہ عمران خان ولوں ردعمل ساہمنے آیا اے۔ عمران خان نے پاکستان دے دورہ ورلڈ الیون نوں چنگا آکھیا اے۔ عمران خان دا کہنا اے کہ ورلڈ الیون نوں پاکستان لیان دا فیصلا چنگا کم اے۔
عمران خان دا ہور کہنا سی کہ لوکائی اپنے ملک وچ بین الاقوامی کرکٹ ویکھن لئی ترسدے پئے نیں۔اوہناں نوں امید اے کہ ورلڈ الیون دا دورہ پاکستان کامیاب رہوے گا۔ یاد رہوے کہ پہلے عمران خان ولوں پاکستان سپر لیگ دے فائنل دے پاکستان وچ انعقاد دی مخالفت کیتی گئی سی،پر ہن اوہناں ولوں ورلڈ الیون دے پاکستان دے دورے دی حمایت کیتی گئی اے۔
