لاہور(پاکستان پوائنٹ نیوز01۔جولائی2017َء) قومی ٹیم دے کپتان سرفراز احمد نے غلطیاں توں سبق سکھ کے عظیم کپتاناں دی صف وچ شامل ہون دا ارادا کر لیا۔ اک انٹرویو وچ سرفراز احمد نے آکھیا کہ چیمپئنز ٹرافی وچ فتح زندگی دا نہ بھلن والا ویلا اے تے ملک واپسی اُتے لوکائی ولوں ملن والی عزت اُتے لوکائی دا شکریا ادارکرنا واں۔ سرفراز احمد دا کہنا سی کہ میںایہ کدی نہیں سوچیا کہ اک ٹائٹل جِت کے عظیم کپتان بن گیا واں۔
سرفراز احمد نے آکھیا کہ قومی ٹیم دی قیادت آسان نہیں، اک غلطی اُتے تہانوں سخت تنقید دا ساہمنا کرنا پیندا اے۔ بھارت نال پہلے میچ مگروں اگلے مقابلیاں وچ میرے کئی فیصلے ٹھیک ثابت ہوئے۔ فخر زمان نوں ڈیبیو دا موقع دینا وی اک چنگا فیصلا سی۔ ون ڈے تے ٹی ٹونٹی کپتان نے آکھیا کہ سری لنکا خلاف میچ وچ گراﺅنڈ نِکا ہون اُتے فہیم اشرف نوں پلیئنگ الیون وچ شامل کیتا۔ا نگلینڈ نال سیمی فائنل وی ایسے دینیو اُتے سی پر پچ استعمال شدا ہون دی وجہ توں شاداب نوں واپس لیائے۔ اک سوال دے جواب وچ اوہناں نے آکھیا کہ سینئرز نال مشورا نہ کرن دا تاثر درست نہیں ، میں حفیظ تے شعیب ملک دی رائے نوں اہمیت دینا واں۔
