اسلام آباد(پاکستان پوائنٹ نیوز29۔جون2017ء) مشہور پرچا کار حامد میر نے انکشاف کیتا اے کہ ورلڈ کپ 1999وچ پاکستان تے بنگلا دیش وچکار میچ دوران اوس ویلے مسلم لیگ (ن) دی حکومت دے وزیراں نے بنگلا دیش اُتے پیسے لائے ہوئے سن۔ نجی ٹی وی دے پروگرام وچ گل بات کردے ہوئے حامد میر دا کہنا سی کہ ورلڈ کپ 1999وچ پاکستان تے بنگلا دیش دے میچ توں پہلاں خواجا آصف نے مینوں آکھیا کہ اسفند یار ولی وی میچ ویکھن آ رہے نیں ایس لئی تُسیں وی آ جاﺅ، میں حامی بھر لئی، میچ شروع ہویا تے ہور وی کئی حکومتی وزیر اوتھے آ گئے۔
حامد میر مطابق اوہناں نے نوٹ کیتا کہ کُجھ چِر پچھوں اسفند یار ولی اُٹھ کے خواجا آصف دے کمرے وچ جاندے تے کسے نال ٹیلی فون اُتے گل بات کر کے واپس آ کے تسبیح گھمانا شروع کر دیندے، اوتھے جو کُجھ چل رہیا سی اوہدے توں میں نوٹ کیتا کہ ایتھے بُہتا رجحان بنگلا دیش ول اے تے ایہ سارے چاہ رہے نیں کہ بنگلا دیش میچ جِتے۔ حامد میر مطابق اوہناں نے پرنس سید صلاح الدین توں پُچھیا تے اوہناں نے آکھیا کہ ایتھے بیٹھے اکثر لوکاں نے بنگلا دیش اُتے پیسے لائے ہوئے نیں، تُسیں بنگلا دیش نوں دس دو کہ اج اوہ جِتن گے۔
پتا چلیا کہ اسلام آباد دے اک ہوٹل وچ بک لگی ہوئی اے تے دھڑا دھڑ بنگلا دیش اُتے پیسے لگ رہے نیں۔ حامد میر مطابق اوہناں نے اسفند یار ولی توں پُچھیا کہ تُسیں اندر جاکے کہدے نال گلاں کر رہے او؟ جہدے اُتے اوہناں نے دسیا کہ میں اپنی دھی نال گل کر رہیا واں جو مصلے اُتے بِہ کے پاکستان دی جِت دی دعا کر رہی اے تے میں وی تسبیح گھما رہیا واں۔ حامد میر مطابق میں اسفند یار ولی نوں آکھیا کہ پاکستان اج مشکل نال جِتے گا، اسفند یار نے وجہ پُچھی تے میں دسیا کہ ایہ جو پاکستان بنان والی جماعت دے وزیر ایتھے بیٹھے نیں اوہناں نے بنگلا دیش اُتے پیسے لائے ہوئے نیں۔
اسفند یار ولی نے اوہناں لئی مَندے اکھر بولے تے تسبیح گھمانا تیز کر دتی۔ میچ ختم ہویا تے غدار اسفند یار والی دا پاکستان ہار گیا تے محب وطن مسلم لیگ دا بنگلا دیش جِت گیا۔
