لندن(پاکستان پوائنٹ نیوز06۔مئی2017ء) برطانوی تحقیقاتی ادارے نیشنل کرائم ایجنسی نے پاکستان کرکٹ بورڈ (پی سی بی) نوں سپاٹ فکسنگ سکینڈل دے مرکزی کردار ناصر جمشید خلاف تحقیقات کرن دی اجازت دے دتی۔ ناصر جمشید نے اپنے وکیل راہیں ایہ اعتراض چُکیا سی کہ اوہناں خلاف برطانوی نیشنل کرائم ایجنسی سپاٹ فکسنگ سکینڈل وچ ملوث ہون بارے تحقیقات کررہی اے ایس لئی پی سی بی اوہناں خلاف تحقیقات نہ کرے۔
پی سی بی وسیلیاں مطابق ایس اعتراض دی وجہ توں پی سی بی تے کرکٹ دی عالمی تنظیم (آئی سی سی) نے برطانوی ادارے نیشنل کرائم ایجنسی نال رابطا کیتا سی جہدے مگروں برطانوی تحقیقاتی ادارے نے پاکستان نوں پیغام گھلیا اے کہ اوہناں نوں ناصر جمشید توں تحقیقات دے حوالے نال کوئی اعتراض نہیں۔ وسیلیاں دے مطابق ادارے نے آکھیا کہ پی سی بی چاہوے تے اپنیاں تحقیقات کر سکدا اے، اسیں اپنیاں تحقیقات برطانیا وچ ای کراں گے پر ایس معاملے اُتے ہن تک ناصر جمشیددا موقف ساہمنے نہیں آیا۔
ایس توں پہلے پچھلے مہینے 14اپریل نوں اک ویڈیو پیغام وچ ناصر جمشید نے اپنے اُتے لائے گئے الزاماں نوں رد کردے ہوئے آکھیاکہ نہ اوہناں گھر بدلیا تے نہ ای اوہ کسے توں لُک رہے نیں۔چیتے رہوے کہ پاکستان سپر لیگ (پی ایس ایل)دے دوجے ایڈیشن دے پہلے دن سپاٹ فکسنگ سکینڈل ساہمنے آیا سی جہدے وچ مبینہ طور اُتے ملوث ہون والے کھڈاریاں نوں معطل کر دتا گیا سی جہناں وچ خالد لطیف، محمد عرفان، شاہ زیب حسن، شرجیل خان تے ناصر جمشید شامل نیں، ناصر جمشید پی ایس ایل دا حصہ نہیں سن۔ قومی ٹیم دے اوپنر ناصر جمشید نوں سپاٹ فکسنگ وچ ملوث ہون دے شبھے وچ برطانیا اندر تفتیشی اداریاں نے یوسف نامی بکی نال گرفتار کیتا سی پر اوہناں نوں مگروں ضمانت اُتے چھڈ دتا گیا۔
