راولپنڈی(پاکستان پوائنٹ نیوز28۔اپریل2017ء) پاکستان کپ وچ پنجاب دی ٹیم دے کپتان عمر اکمل ولوں فاسٹ باﺅلر جنید خان بارے غیر ذمے وارانا بیان دین مگروں اوہناں دی چیمپئنز ٹرافی توں چھٹی دا امکان اے۔ تفصیل دے مطابق پاکستان کپ دوران ڈسپلن دی خلاف ورزی اُتے چیف سلیکٹر انضمام الحق عمر اکمل توں رُسے نظر آﺅندے نیں جدکہ پی سی بی ولوں بنائی گئی انکوائری کمیٹی نے عمر اکمل تے جنید خان دے بیان ریکارڈ کر لئے نیں، پنجاب دی ٹیم دے منیجر تے کوچ نے وی عمر اکمل خلاف بیان دے دتا اے، جہدے مگروں امکان اے کہ عمر اکمل دی چیمپئنز ٹرافی توں چھٹی ہو جائے گی۔
چیتے رہوے کہ پاکستان کپ دے میچ وچ جنید خان دے رلت نہ ہون اُتے عمر اکمل نے اوہناں نوں لاپتا قرار دتا سی جہدے مگروں جنید خان نے ویڈیو پیغام جاری کردے ہوئے وضاحت کیتی کہ اوہناں نوں بخار تے فوڈپوائزننگ اے تے ڈاکٹر نے اوہناں نوں آرام دا مشورا دتا اے۔
