پاکستان کپ: جنید خان میچ توں پہلے غائب، کپتان عمر اکمل پریشان

راولپنڈی(پاکستان پوائنٹ نیوز27۔اپریل2017ء) ٹیسٹ کرکٹر جنید خان پاکستان کپ دوران اچن چیت غائب ہو گئے۔ تفصیل دے مطابق جنید خان پنجاب دی ٹیم ولوں پاکستان کپ کھیڈ رہے سن جہدا اج سندھ نال اہم میچ سی۔ جنید خان میچ لئی گراﺅنڈ وچ نہیں آئے تے اوہناں دے لاپتا ہون بارے ٹیم انتظامیا نوں وی کوئی اطلاع نہیں اے۔ پنجاب دی ٹیم دے کپتان عمر اکمل نے دسیا کہ جنید خان کل تے ٹیم میٹنگ وچ سن پر ہن اوہناں دے اچن چیت غائب ہون پاروں ٹیم انتظامیا پریشان اے۔ دوجے پاسے جنید خان نے اپنے اک بیان وچ دسیا کہ طبیعت دی خرابی کارن میچ نہیں کھیڈ رہا، جہدے بارے ٹیم مینجمنٹ تے ڈاکٹر نوں وی دسیا سی۔