ڈھاکا(پاکستان پوائنٹ نیوز24۔اپریل2017ء) ڈومیسٹک کرکٹ وچ کرپشن دی بُو نے بنگلا دیشی بورڈ نوں ہلاک کے رکھ دتا، اینٹی کرپشن حکام نے 4گینداں اُتے 92سکور بنن دے معاملے دیاں تحقیقات شروع کر دتیاں نیں جہدے لئی تن رکنی کمیٹی وی بنا دتی گئی۔ تفصیل دے مطابق پچھلے دِناں ایگزائیم کلب خلاف سکینڈ ڈویژن ڈھاکا لیگ میچ وچ لال ماتیا دے باﺅلر سجن محمود نے اننگز دے پہلے ای اوور وچ چار گینداں اُتے 92سکور کھاکے مخالف ٹیم نوں میچ جتوا دتا، ایس دوران اوہناں نے صرف 4لیگل گینداں کیتیاں، باﺅلر دے ایس فعل دا مقصد پہلے بیٹنگ کرن والی اپنی مخالف ٹیم خلاف غلط امپائرنگ فیصلیاں اُتے احتجاج کرنا سی۔
اوہناں دی ایہ حرکت دنیا بھر دے میڈیا دی خبر بنی۔ ہن بنگلا دیشی کرکٹ بورڈ نے ایس معاملے دیاں تحقیقات لئی اک تن رکنی کمیٹی بنا دتی اے۔ دوجے پاسے بی سی بی دے صدر نظم الحسن نے ذکر کیتے گئے واقعے نوں بنگلا دیشی کرکٹ لئی خطرناک قرار دتا۔ اوہناں دے مطابق ایس معاملے دی پُن چھان کرپشن یونٹ کر رہیا اے جدکہ بی سی بی دے ڈائریکٹرز جلال یونس، اکرم خان تے شیخ سہیل واقعے وچ ملوث سارے فریقاں توں پُچھ گچھ کرن گے، جہناں وچ کپتان، کوچز تے امپائرز شامل نیں۔ نظم الحسن دا کہنا اے کہ اینٹی کرپشن یونٹ نال ایہ معاملا ساڈی اُچیچی کمیٹی وی ویکھ رہی اے جو تن دناں وچ اپنی رپورٹ سانوں پیش کر دیوے گی۔
