ڈھاکہ، لاہور(پاکستان پوائنٹ نیوز28۔مارچ2017ء) بنگلا دیش کرکٹ بورڈ نے حکومت ولوں منظوری نہ ملن اُتے پاکستان کرکٹ بورڈ دی دورا پاکستان دی دعوت نوں رد کر دتا۔ میڈیا رپورٹ دے مطابق پاکستان کرکٹ بورڈ نے بنگلا دیش نوں سیریز لئی دورا پاکستان دی دعوت دتی سی تے پاکستان سپر لیگ دے فائنل دے کامیاب انعقاد مگروں دورے دی ڈاڈھی امید سی پر بنگلا دیش حکومت نے ٹیم نوں پاکستان نہ گھلن دا فیصلا کیتا۔
چیئرمین پی سی بی دا کہنا اے کہ بنگلا دیش کرکٹ بورڈ نے ٹیم پاکستان نہ گھلن دا فیصلے بارے دس دتا اے۔ پاکستان کرکٹ بورڈ دے چیئرمین شہریار خان نے آکھیا کہ پی سی بی نے بنگلا دیش نوں چالو ورھے دو ٹی ٹونٹی میچاں لئی دورا پاکستان دی دعوت دتی سی پر بنگلا دیش کرکٹ بورڈ نے ٹیم پاکستان گھلن توں معذرت کر لئی۔اوہناں نے آکھیا کہ پاکستانی ٹیم پچھلے ورھے دو وار بنگلا دیش لئی گئی تے بنگلا دیش کرکٹ بورڈ ولوں دورا پاکستان توں انکار مگروں پی سی بی چالو ورھے جولائی وچ پاکستانی ٹیم دے دورا بنگلا دیش دے حوالے نال سوچے گا۔ شہریار خان نے آکھیا کہ بنگلا دیش دے انکار مگروں ہن اسیں وی چالو ورھے پاکستان کرکٹ ٹیم دے دورا بنگلا دیش بارے یقین نال کُجھ نہیں کہہ سکدے۔
